«Atyraý-Inder» baǵytyndaǵy tas jol boıyna patrýldik polısııa kóligi men úı janýarlarynyń maketi qoıyldy, dep jazady Egemen.kz.
Oblystyq polısııa departamenti baspasóz qyzmetinen málim etkendeı, maqsat – júrgizýshilerdi jol-kólik apatynan saqtandyrý.
«Kólikterdiń jol boıynda júrgen iri qarany qaǵýy jıilep barady. Máselen, 17 shildede tańǵy saǵat 05:00 shamasynda «Atyraý-Oral» tas jolymen Almaly aýylyna qaraı qozǵalǵan «Vaz-21101» avtokóliginiń júrgizýshisi jol qaýipsizdigin saqtamaı, túıeni qaǵyp ketken. Polısııa qyzmetkerleri oqıǵa ornynan ketip qalǵan 59 jastaǵy júrgizýshini anyqtady», dep habarlady departamenttiń baspasóz qyzmeti.
Osyndaı oqıǵanyń aldyn alý úshin departamenttiń ákimshilik polısııa basqarmasy men oblystyq jolaýshylar kóligi jáne avtomobıl joldary basqarmasy «Atyraý-Inder» baǵytyndaǵy tas jolǵa patrýldik polısııa kóligi men úı janýarlarynyń maketin ornatýdy qolǵa aldy. Qazir bul maketter úı janýarlary kóp júretin, sondaı-aq jol-kólik oqıǵasy bolýy múmkin qaýipti ýchaskelerde tur.