Qazaqstanda aýyl ákimderiniń tikeleı saılaýy ótti. 14 oblysta 1847 saılaý ýchaskesinde azamattarymyz óz tańdaýyn jasady. 730 orynǵa eki myńnan astam úmitker óz kandıdatýralaryn usyndy. Bul bir orynǵa 3 úmitkerden artyq básekelestik bolǵanyn bildiredi. Passıvti saılaý quqyǵyn paıdalanýdaǵy bul belsendilik – halyqtyń saıası proseske joǵary qatysýynyń kórsetkishi.
Meniń oıymsha, bul saılaýdy saıası júıeni reformalaý prosesindegi oń qadam dep ataýǵa bolady. Aýyl ákimin janama tańdaýdan tikeleı daýys berýge kóshý sheńberinde biz aýyl halqynyń sheshim qabyldaý prosesine belsendi qatysýyna yqpal etetin mańyzdy qadamdardyń birin jasadyq. Tikeleı saılaý ótkizý keıinnen saılaýshylarǵa jańa ákimniń jumysyna óz kózqarasyn bildirýge múmkindik beredi.
Daýys berý kúniniń aldyn ala qorytyndysy boıynsha biz saılaýshylardyń joǵary belsendiligin baıqadyq. Keıbir óńirlerde saılaýshylardyń daýys berýge qatysý kórsetkishi 90%-dan asty. Bul osy saıası oqıǵaǵa aýyl turǵyndarynyń erekshe qyzyǵýshylyǵyn kórsetedi.
Sonymen qatar saılaýshylar bolashaq ákimdi tańdaýda óte jaýapty bolýy kerek, óıtkeni bul jaı ǵana «keldi, kórdi, daýys berdi» áreketiniń algorıtmi emes. Bul – óz aýylynyń bolashaq damýyn tańdaý, munyń ózi úmitkerlerdiń saılaýaldy baǵdarlamasyn jáne ózderi daýys beretin adamdardyń kim ekendigin zerttep bilýdi talap etetindigi anyq.
Indıra RYSTINA,
Prezıdent janyndaǵy QSZI áleýmettik-saıası zertteýler bóliminiń basshysy