Tokıo Olımpıadasynyń qola júldegeri Sofıa Berýlseva búgingi jeńisi jaıly aıtyp berdi, dep habarlaıdy Egemen.kz.
Búgin, 7 tamyz kúni qazaqstandyq karateshi Sofıa Berýlseva Olımpıada oıdyndarynan el qorjynyna qola júldeni saldy.
20 jasar sportshy toptyq kezeńde úzdik atanyp, ýaqytynan buryn jartylaı fınalǵa joldama aldy.
Alaıda jartylaı fınalda egıpettik Ferıal Abdelazızge 5:4 esebimen jol berip, qola júldeni qanaǵat tutty.
Jarystan keıin jýrnalısterge bergen suhbatynda sportshy áserin bólisip, kózine jas aldy.
«Árıne, qýanyshtymyn. Biraq fınalǵa shyǵýǵa bolatyn edi. Barymdy saldym. Kishkene jetpeı qaldy... Fınalǵa kishkene jetpeı qalǵanda ókinishten kózime jas keldi.
Búgingi qarsylastarymnyń eshqaısysymen osy ýaqytqa deıin jarysta kezdesken emespin. Jartylaı fınalda bir-eki soqqy alǵannan keıin kishkene tapyraqtap qaldym. Bul jerde tóreshini de, eshkimdi kinálaı almaısyń. Bári ádil ótti. Nátıjesi osy», deıdi.
Sofıa Berýlseva Olımpıada oıyndaryna joldamany sońǵy sátte aldy. Ol karateden reıtıng boıynsha da, lısenzııalyq jarysta da utylyp qalyp, Olımpıada joldamasynan tys qalǵan bolatyn.
Alaıda Azııa aımaǵynda olımpıadalyq sıklda áıelder arasynda eń kóp upaı jınaǵan sportshy retinde Halyqaralyq karate federasııasynyń D3 kartasyna ıe bolyp, Tokıo Olımpıadasyna qatysýǵa múmkindik aldy.
«Joldamany sońǵy sátte alǵanym ózime jaqsy boldy. Kóbisi reıtıng boıynsha joldamaǵa ıe bolyp, biraz jarystarǵa qatyspaı júrdi. Biz jarysty da, jattyǵý jıyndaryn da toqtatqan joqpyz. О́z formamyzdy saqtap, sońǵy sátke deıin daıyndaldyq. Osy turǵydan joldamany sońynda alǵannyń men úshin paıdasy kóp boldy».
Sofıanyń medali karateden Qazaqstan quramasynyń Tokıo Olımpıadasyndaǵy ekinshi júldesi.
Ol karateden Olımpıada oıyndarynda áıelder arasynda júlde alǵan tuńǵysh qazaqstandyq sportshy retinde el sportynyń tarıhyna endi. Karateshi Olımpıadanyń qola júldesimen toqtap qalmaıtynyn jetkizdi.
«Bizge munymen toqtaýǵa bolmaıdy. Alda bizdi Azııa jáne álem chempıonaty kútip tur. Biraz demalystan keıin qalpymyzǵa oralyp, jattyǵýymyzdy ári qaraı jalǵastyramyz».
20 jasar jankeshti Sofıa búgingi júldesin marqum ustazy Jastalap Sanaýovqa arnady.
Karateden Qazaqstan ulttyq quramasynyń bas bapkeri bolǵan ol 2020 jyldyń 31 jeltoqsanynda mezgilsiz dúnıeden ótti.