Almaty dárigerleri Sinopharm qytaılyq vaksınasy qala turǵyndary úshin qashan qoljetimdi bolatynyn aıtty, dep habarlaıdy Egemen.kz Tengrinews.kz-ke silteme jasap.
Qalalyq qoǵamdyq densaýlyq basqarmasynyń málimetinshe, jaqynda Qazaqstanǵa Sinopharm Qytaı farmasevtıkalyq kesheni óndiretin Vero Cell vaksınasy kelip tústi. Preparat Pekınnen Almatyǵa jetkizildi.
«Qazirgi ýaqytta Vero Cell vaksınasy «SK-Farmasııa» qoımasynda. Vaksına Almaty qalasy Qoǵamdyq densaýlyq basqarmasynyń qoımasyna áli túsken joq. Vaksına emhanalarǵa túsken boıda, halyqqa aqparat beriletin bolady. Azamattardyń tamyz aıynyń ortasynda vaksınasııalaý úshin atalǵan preparatqa qol jetkizýi kútilýde», dep habarlady vedomstvonyń baspasóz qyzmeti.
Buǵan deıin habarlanǵandaı, Almatyǵa Sinopharm kompanııasynan bir mıllıon doza mólsherinde qytaılyq Vero Cell vaksınasynyń birinshi partııasymen ushaq keldi. Qazaqstan atalǵan vaksınanyń tórt mıllıon dozasyn satyp aldy.
Osy jyldyń 7 mamyrynda Vero Cell qytaılyq vaksınasyn Dúnıejúzilik densaýlyq saqtaý uıymy maquldaǵan. Shildede ol COVAX vaksınalar bankine endi. Vaksına belsendi emes, eki dozaly. Saqtaý merzimi-24 aı.
DDU qaýipsiz jáne tıimdi dep jiktelgen alǵashqy qytaı preparaty 45 elde eresekterge vaksınasııalaýǵa ruqsat etilgen. Búgingi tańda Qytaıdan basqa, vaksına BAÁ men Serbııada óndirýge maquldandy. Sonymen birge, Qytaı men BAÁ úsh jastan 17 jasqa deıingi balalarǵa arnalǵan Sinopharm Qytaı farmakologııalyq kompanııasynyń ınaktıvtendirilgen vaksınasyn shuǵyl qoldanýdy maquldady.