Atyraýda balalardy sportqa tartý úshin qosymsha 315 seksııa ashý kózdelip otyr, dep jazady Egemen.kz.
Oblystyq dene shynyqtyrý jáne sport basqarmasynyń basshysy Rınat Ibragımovtyń málimetine súıensek, sporttyq mekemelerde turaqty shuǵyldanýshy jasóspirimderdiń úlesi mektep jasyndaǵy balalar sanynyń 16,5 paıyzyn quraıdy. Jyl aıaǵyna deıin balalarǵa arnalǵan tegin 315 qosymsha seksııa ashyp, shuǵyldanýshylar sanyn 6500-ge jetkizý josparlanǵan.
«El Táýelsizdiginiń 30 jyldyǵyna oraı, «Qazaqstan – sporttyq ult» jobasy aıasynda 35 is-shara, onyń ishinde taekvondo, boks pen kıkboksıngten respýblıkalyq chempıonaty, jekpe-jekten batys aımaqtyq kýbogi, kásipqoılar arasynda MFC halyqaralyq týrnıri ótti. Memleket basshysy halyqqa Joldaýynda sport klýbtarynyń qarjysyn ońtaılandyrý, balalar men jasóspirimder sportyna erekshe kóńil bólýdi tapsyrǵan edi. Osyǵan baılanysty kásibı klýbtar qarjysy qysqartylyp, qosymsha 1000 bala seksııalarǵa tartyldy» deıdi Rınat Ibragımov.
Onyń aıtýynsha, jyl basynan beri oblys sportshylary el chempıonattarynan 550 medal ıelengen. Sondaı-aq, 1 sportshy álem chempıonatynan, 7 sportshy Azııa chempıonatynan, 7 sportshy álem kýboginen, 81 sportshy halyqaralyq týrnırlerden jeńimpaz nemese júldeger bolyp oralǵan. Komandalyq sport túrlerinen atyraýlyq basketbolshylar el chempıonatynyń kúmis, strıtbol komandasy altyn, voleıboldan jastar komandasy, sý doby jáne «Naryn» eresekter komandasy qola júldeni ıelengen.
«Maman tapshylyǵy máselesin sheshý maqsatynda birqatar jumys atqaryldy. Sońǵy úsh jylda «Dene shynyqtyrý jáne sport» mamandyǵyna bólingen oblys ákimi granttarynyń alǵashqy túlekteri 2022 jyly sport mekemelerine kelip, turaqty jumysqa ornalasady» deıdi Rınat Ibragımov.