Sybaılas jemqorlyqqa qarsy is-qımyl agenttiginiń Nur-Sultan qalasy boıynsha departamentiniń qyzmetkerleri QR Qylmystyq kodeksiniń 366-babynda kórsetilgen qylmysty jasady degen kúdikpen (para alý) «Aqmola oblysynyń Aýyl sharýashylyǵy basqarmasy» MM basshysy Talasbaev Dımash Amanjolulyn ustady, dep habarlaıdy Egemen.kz.
Bul týraly kokshetau.asia saıty málimdedi.
Jergilikti saıttyń habarlaýynsha, oblystyq Aýyl sharýashylyǵy basqarmasynyń basshysy Dımash Talasbaev Almaty qalasynda kelisilgen somanyń jartysyn - 13 mln teńgeni alǵan kezde ustalǵan. Paranyń jalpy somasy shamamen 30 mln teńgeni quraýy tıis edi.
Dımash Talasbaev Aqmola oblysy Aýyl sharýashylyǵy basqarmasynyń basshysy bolyp 2020 jyldyń sáýir aıynda taǵaıyndaldy.
Al Talasbaev Dımash Amanjoluly 1969 jyly Kókshetaý oblysy, Rýzaev aýdany, Rýzaevka aýylynda týǵan. 1994 jyly Kókshetaý aýylsharýashylyq ınstıtýtyn «ǵalym-agronom» mamandyǵy boıynsha bitirgen. 2006 jyly «Femıda» zań akademııasyn «zańger» mamandyǵy boıynsha támamdaǵan. 2018 jyly Gýmanıtarlyq-tehnıkalyq akademııany bitirip, ekonomıka magıstri dárejesine ıe bolǵan. Úılengen, úsh bala tárbıelep otyr.
Eske sala keteıik, 2020 jyldyń qazan aıynda Aqmola oblysynyń Mádenıet, arhıvter jáne qujattama basqarmasynyń basshysy Rýstam Bıkenev iri kólemde birneshe ret para alǵany úshin 7 jylǵa bas bostandyǵynan aıyryldy. 2021 jyldyń sáýir aıynda Aqmola oblysy Densaýlyq saqtaý basqarmasynyń basshysy Súlen Ilııasov ózine senip tapsyrylǵan múlikti qyzmet babyn paıdalana otyryp asa iri mólsherde jymqyrdy degen aıyppen qamaýǵa alyndy.