Gaıtıde 14 tamyzda bolǵan jer silkinisinen zardap shekkenderdiń sany 2189-ǵa jetti, 12 myńnan astam adam jaraqat aldy. Bul týraly sársenbide respýblıkanyń azamattyq qorǵaý departamenti málimdedi, dep habarlaıdy Egemen.kz TASS-qa silteme jasap.
Vedomstvonyń málimetinshe, Ońtústik departamentte - 1832 adam, Grand Ans bóliminde - 218, Nıpp bóliminde 137 jáne soltústik-batys bóliminde eki adam qaıtys boldy. Sondaı-aq 12 268 jaraly tirkeldi.
О́ńirdegi 100 myńnan astam ǵımarat tolyǵymen nemese ishinara qırady, qazirgi ýaqytta qutqarýshylar úıindi astynan adamdardy izdep jatyr.
Esterińizge sala keteıik, 14 tamyz kúni tańerteń Gaıtı aımaǵynda magnıtýdasy 7,2 bolatyn jer silkinisi boldy. Jer silkinisiniń oshaǵy shamamen 125 myń adam turatyn Le-Ke kommýnasynan 40 km qashyqtyqta ornalasqan. Ońtústik, Grand Ans jáne Nıpp departamentteri qatty zardap shekti.
Úkimet bir aıǵa tótenshe jaǵdaı engizdi.
Dúısenbige qaraǵan túni Gaıtıdegi joıqyn jer silkinisinen keıin Greıs tropıkalyq daýyly soqty. Bul zardap shekkenderge kómek kórsetýdi jáne tiri qalǵandardy izdeýdi odan ári qıyndatty.