Taekvondodan Qazaqstan chempıony Azamat Teńizbaevqa Ulybrıtanııa sotynyń úkimimen Izraıl azamatshasyna qol júgirtti degen aıyp taǵylǵan bolatyn. Jaqynda ol aqtalyp, elge oraldy. Bul týraly Egemen.kz tilshisi habarlady.
Búgin, Astanada Azamat Teńizbaevtyń elimizge oralýyna baılanysty Qazaqstan Taekvondo federasııasy baspasóz máslıhatyn ótkizdi. Jıynda sóz alǵan Qazaqstan Taekvondo (WTF) federasııasynyń prezıdenti Vıacheslav Kım jarty jyl buryn oryn alǵan oqıǵanyń mán-jaıy jóninde bylaı dedi: «О́zderińiz biletindeı, Azamat Teńizbaev 2013 jyldyń 15-21 shilde aralyǵynda Meksıkada ótken Taekvondodan álem chempıonatynyń sońǵy kúninde jeńilip qaldy. Eline qaıtarda kóńil-kúıi bolmaı, ushaqtaǵy orynǵa yńǵaısyzdaý jaıǵasqan eken. Tynymsyz jattyǵýlar men ushaqta 12 saǵat boıy otyrý Azamattyń eriksiz uıyqtaýyna áser etti. Onyń birde qoly, birde basy qasynda otyrǵan Izraıl azamatshasynyń denesine tıip ketkendikten, bort jol serigi Azamattyń basqa jerge otyrýyn ótindi. Sosyn ol komandadaǵy áriptesi Juldyzben oryn almastyrady. Biraq, Londonnyń Hıtroý áýejaıyna kelgende, jergilikti polıseıler ony ustap áketken».
Anglııanyń zańy boıynsha, aıyptalýshy bir ret tegin advokat jaldaýǵa quqyly. Osy oraıda Azamattyń aıtýy boıynsha, onyń qorǵaýshysy bolǵan Shynar: «Eger, kináni moınyna alatyn bolsań, is úlken sotqa ótpeıdi. Sondyqtan úıińe tezirek qaıtqyń kelse, sotta «kinálimin» deýiń kerek depti. Alaıda, jerlesimiz onyń aıtqanyn tyńdaǵanymen, is odan ári ýshyǵyp ketken. Artynan qorǵaýshynyń aldaǵany málim boldy.
Budan keıin Azamattyń ata-anasy balasyn kepildikpen qalada júrýine ruqsat alǵan. Ondaǵy tártipke sáıkes, 20:00-den tańǵy 8:00-ge deıin úıden shyǵýǵa bolmaıdy. Jalpy, alty aıǵa sozylǵan ýaqyt aralyǵynda jerlesimiz aǵylshyn tilin birshama meńgeripti.
Keleńsizdiktiń basy-qasynda shyr-pyr bolyp júrgen sportshynyń anasy Jazıra Tileshova baspasóz máslıhatynda óz páterin satyp jibergenin aıtyp, kóz jasyna erik berdi: «Ulym úshin barlyǵyn qurban etýge daıynmyn. Páterimizdi satyp, 10 myń dollarǵa bilikti advokat jaldadym. Shúkir, qazir barlyǵy ornyna keldi. Bizge qoldaý kórsetkenderge alǵysym sheksiz».
Teńizbaevtar otbasy úshin taǵy bir qýanyshty jańalyq – buǵan deıin 15 myń dollar kóleminde járdem kórsetken Qazaqstan Taekvondo federasııasy taıaý kúnderi Azamattyń ata-anasy shyǵyndaǵan 60 myń dollardy da tolyǵymen ótep beretin boldy.
Azamat baspasóz máslıhatynda keleside shetelge barǵanynda muqııat bolatynyn málimdedi. Ol bir aptadaı tynyǵyp alǵan soń Qazaqstan quramasymen birge kezekti oqý-jattyǵýǵa kirisedi.
Dastan Kenjalın.
Almas Manap.
Derekkóz: Egemen.kz.
Foto: Almas Manap.