Qytaıda parlament halyq sany jáne josparly bosaný týraly zańǵa túzetýler engizdi. Endi otbasylarǵa úsh balaǵa deıin bosanýǵa ruqsat beredi. Bul týraly «Sınhýa» aqparat agenttigi habarlady, dep jazady Egemen.kz.
Vedomstvonyń habarlaýynsha, Qytaı Halyq Respýblıkasynyń halyq sany jáne josparly bosaný týraly zańyna engizilgen ózgerister Búkilqytaılyq halyq ókilderi jınalysy turaqty komıtetiniń (QUTK turaqty komıteti) jalǵasyp jatqan sessııasynda qabyldandy.
Buǵan qosa, zań jobasy zań buzǵan erli-zaıyptylarǵa aıyppuldy qosa alǵanda, burynǵy shekteý sharalaryn alyp tastady.
Sondaı-aq bala kútimine baılanysty demalysty qarastyrý jáne turǵyn úı massıvterinde, qoǵamdyq oryndarda jáne jumys oryndarynda analar men balalarǵa kóbirek buryshtar men arnaıy jabdyqtar jasaý máselesi kóterildi.
Halyq sany jáne josparly bosaný týraly zań 2002 jyly kúshine engen bolatyn. Al 2015 jyly Qytaı erli-zaıyptylaryna eki balaly bolýǵa ruqsat berildi.