Keshe Astana qalasy ákimdiginiń májilis zalynda Elbasy Nursultan Nazarbaevtyń «Qazaqstan joly-2050: bir maqsat, bir múdde, bir bolashaq» atty Joldaýynyń elimiz úshin strategııalyq mańyzyn saralaǵan qala aktıviniń keńeıtilgen májilisi bolyp ótti. Onda Astana qalasynyń ákimi Imanǵalı Tasmaǵambetov baıandama jasady.
Keshe Astana qalasy ákimdiginiń májilis zalynda Elbasy Nursultan Nazarbaevtyń «Qazaqstan joly-2050: bir maqsat, bir múdde, bir bolashaq» atty Joldaýynyń elimiz úshin strategııalyq mańyzyn saralaǵan qala aktıviniń keńeıtilgen májilisi bolyp ótti. Onda Astana qalasynyń ákimi Imanǵalı Tasmaǵambetov baıandama jasady.
«Bıylǵy Joldaý biz úshin ortalyq oıdy saralap, onyń árbir túıinin jańalap turǵan, halyq bolyp birigip, qoǵam bolyp jumylyp atqarar eń basty qujat... Sóz joq, osynaý tutas halqymyz úshin ortaq tarıhı jolda el ordasy Astanaǵa júkteletin mindettiń orny aıryqsha, júgi salmaqty bolmaq. Muny Elbasy óz Joldaýynda qalamymen qadap, sheshimimen shegelep berdi», dep bastady baıandamasyn Imanǵalı Tasmaǵambetov. Odan ári baıandamashy ınnovasııa, ǵylymı qamtymdy ekonomıka, agroónerkásiptik keshen, energetıkalyq jáne kóliktik salalardaǵy ınfraqurylymdy damytý, áleýmettik saladaǵy qyzmet kórsetý sapasyn arttyrý arqyly qazaqstandyqtardyń áleýetin ashý syndy Elbasynyń Joldaýynda júktelgen naqty tapsyrmalardy jikteı kelip, Astananyń taıaý bolashaqtaǵy damý baǵdaryna keńinen toqtaldy.
Joldaýda Úkimet bıyl IJО́ ósimin 6-7 paıyz deńgeıinde qamtamasyz etýge tıisti ekendigi atap kórsetilgen bolatyn. Ákimniń aıtýynsha, sońǵy jyldary qala ekonomıkasynyń ósimi shamamen turaqty túrde 7 paıyz deńgeıdi kórsetip keledi. Aldaǵy ýaqytta elimizdiń bas qalasynda jalpy óńirlik ónim óndirý kóleminiń ósimin 8-9 paıyzǵa jetkizý úshin tolyq ekonomıkalyq múmkindikteri bar. Joldaýda atap kórsetilgenindeı, 2050 jylǵa taman elimizde IJО́ kólemin jan basyna shaqqanda 4,5 esege ulǵaıtyp, qazirgi 13 myń dollardan 60 myń dollarǵa deıin arttyrý máselesi kózdelgen. Búgingi naqty eseptik kórsetkishter boıynsha, Astanada 2017 jylǵa qaraı bul kórsetkish 4,7 mıllıon teńge nemese 30 myń dollarǵa jetetin bolady.
Elimizdiń bolashaq damý belesterin aıqyndaǵan bul Joldaýda 2050 jylǵa qaraı elimiz boıynsha eńbek ónimdiligin 24,5 myńnan 126 myń dollarǵa deıin arttyrý mindeti qoıylǵan. Elordada bul kórsetkish qazirgi kúnniń ózinde adam basyna shaqqanda 36 myń dollardan aınalyp otyr. 2016 jyly qaladaǵy Indýstrııalyq park aýmaǵynda jańadan 30 óndiris orny iske qosylyp, ındýstrııalandyrý kartasy aıasyndaǵy kásiporyndar tolyq qýatynda jumys isteı bastaǵanda jáne №3 JEO-nyń alǵashqy kezeńi iske qosylǵanda bas qalamyzdaǵy eńbek ónimdiligi jan basyna shaqqanda 42 myń AQSh dollaryna jetkiziletin bolady.
Qala ákimi Imanǵalı Tasmaǵambetov Joldaýda júktelgen mindetterdi oryndaý ındýstrııalyq-ınnovasııalyq baǵdarlamany oıdaǵydaı júzege asyryp, shaǵyn jáne orta kásipkerlikti júıeli túrde damytýdy jalǵastyrýǵa tikeleı baılanysty ekendigin erekshe atap kórsetti. Qazir Astanada 598 gektar aýmaqta qanat jaıǵan Indýstrııalyq park sátti de tabysty jumys isteýde. Munda ınvestorlarǵa qolaıly tehnıkalyq jaǵdaılar jasalǵan. Parkte jalpy ınvestısııalyq kólemi 181 mıllıard teńgeni quraıtyn 49 joba júzege asyrylýda. Onyń 19-y qazirdiń ózinde belsendi túrde jumys isteýge kirisse, qalǵan 30-y iske qosylý ústinde. Jalpy, Indýstrııalyq parktegi atalǵan jobalardyń barlyǵy 2016 jylǵa qaraı tolyq júzege asyrylatyn bolady. Sol kezeńde elorda joǵary kórsetkishteri bar áleýetti áleýmettik-ekonomıkalyq ahýalǵa qol jetkizedi. Tek 2017 jyldyń ózinde Indýstrııalyq park aýmaǵyndaǵy kásiporyndardyń jyl saıyn óndiretin ónimi 150 mıllıard teńgeni quraıtyn bolady. Munda 8 myńnan astam jańa jumys orny ashylyp, qala bıýdjetine 70 mıllıard teńgeden astam kiris kiredi. Osy bir óndiris aýqymy artqan ındýstrııalyq ortada taýarlar men kórsetiletin qyzmetterdegi qazaqstandyqtardyń úlesi 70 paıyzǵa jetedi dep kútilýde.
Prezıdent Joldaýynda «Orta jáne shaǵyn bıznestiń úlesi artqan saıyn Qazaqstannyń damýy da ornyqty bola túsedi» degen qaǵıdat naqty kórinis tapqan, dedi odan ári baıandamashy. Búgingi kúni Astananyń jalpy óńirlik ónim óndirý kólemindegi qyzmet kórsetý salasynyń úlesi 60 paıyzdan asady. Osy salada 190 myń adam jumys isteıdi, bul bas qaladaǵy eńbekke jaramdy adamnyń besten eki bóligi, dep jalǵastyrdy sózin qala ákimi. Búginde jumysyn belsendi júrgizip kele jatqan shaǵyn kásipkerlik sýbektilerdiń sany – 47 myń. Qalamyzda shaǵyn jáne orta kásipkerlikti qoldaý júıeli jolǵa qoıylǵan. Tek «Bıznestiń jol kartasy-2020» baǵdarlamasyn júzege asyrý sheńberinde ǵana 2017 jylǵa qaraı shaǵyn kásipkerlik sýbektisiniń sany 54 myń birlikke deıin arttyrylmaq. Búgingi tańda qala aldynda turǵan basty mindetterdiń biri – 2020 jylǵa qaraı jalpy óńirlik ónim óndirý kólemindegi qyzmet kórsetý salasynyń úlesin 80 paıyzǵa deıin jetkizý.
Memleket basshysy bıylǵy Joldaýynda el azamattarynyń áleýmettik jaǵdaıyna qolaıly úsh mańyzdy mindetti atap kórsetti, dedi baıandamashy. Onyń aıtýynsha, mundaǵy eń salmaqty mindet – qyzmet kórsetý sapasyn arttyrý. Bul – Joldaýda atap kórsetilgen halyqtyń ómir súrý uzaqtyǵyn 80 jasqa deıin jetkizýge tikeleı yqpal etetin mindet. Bul rette eń aldymen, balalardyń densaýlyǵyn jaqsartýǵa barynsha basymdyq berý qajet. Osy salaǵa jaýapkershiligi joǵary, bilikti dárigerlerdi tartyp, jańa ádistemeler engizý barynsha mańyzdy. Osyǵan baılanysty qala ákimi qalalyq densaýlyq saqtaý basqarmasyna Elbasy alǵa qoıǵan tapsyrmalardy is júzine asyrý úshin tıisti taraptarmen birlese otyryp keshendi baǵdarlama ázirleýdi tapsyrdy.
«Kórip otyrsyzdar, Elbasynyń bıylǵy Joldaýy – memleketimizdiń strategııalyq jolyn ǵana emes, tutas halqymyzdyń «máńgilik ósip-órkendeýge», degen talassyz umtylysyn qordalaıtyn qujat. Qoǵamnyń «Qazaq eliniń ulttyq ıdeıasy qandaı bolýy kerek?» degen kerekti saýalyna Elbasynyń derekti jaýaby. Bolashaǵymyzǵa baǵdar beretin, ultty uıystyryp, uly maqsattarǵa jeteleıtin jasampaz ıdeıa», dep atap kórsetti Imanǵalı Tasmaǵambetov. Qazaqstannyń ekonomıkalyq, áleýmettik, ıntellektýaldyq áleýetine ár qazaqstandyq senimmen qaraýy kerek. Oǵan negiz joq emes. Elimiz táýelsiz ári qarqyndy damý jolyn tańdady. Onyń túp tamyrynda beıbitshilik pen alǵa umtylý qundylyqtary qatar jatyr. «Máńgilik El» elimizdiń ulttyq ıdeıasy – irgeli elimiz ben kemel keleshegimizdiń túp qazyǵy, dep qorytyndylady «Qazaqstan joly-2050: bir maqsat, bir múdde, bir bolashaq» atty Joldaýdaǵy asqaraly maqsat-mindetterdi saralaýǵa arnalǵan qala aktıviniń alqaly jıynyndaǵy sózin qala ákimi.
Elbasynyń «Qazaqstan joly-2050: bir maqsat, bir múdde, bir bolashaq» atty Joldaýynda aıtylǵan maqsat-mindetterdi saralaǵan qalalyq aktıvtiń osy alqaly jınalysynda L.N.Gýmılev atyndaǵy Eýrazııa ulttyq ýnıversıtetiniń kafedra meńgerýshisi, professor Ǵarıfolla Esim, «Nazarbayev University Research and Innovation System» (NURIS) mekemesiniń bas dırektory Qanat Baıǵarın, Astana qalasynyń Kásipkerler palatasynyń dırektory Meıirbek Májıtov, «Astana qalasynyń bas jospary ǴZJI» JShS dırektorynyń orynbasary Gúlnár Qusaıynova jáne basqalar sóz sóılep, kún tártibindegi mańyzdy máselelerge baılanysty oılaryn ortaǵa saldy.
Jylqybaı JAǴYPARULY,
«Egemen Qazaqstan».
Astana.
––––––––––––––––
Sýretterdi túsirgen
Erlan OMAROV.