Bıyl uly aǵartýshynyń týǵanyna 180 jyl boldy, soǵan oraı keshe «Ybyraıdyń izimen» velosherýiniń Nur-Sultan − Qostanaı baǵytyn betke alǵan qatysýshylary bas qaladaǵy Ybyraı Altynsarın kóshesiniń boıynda ustazǵa ornatylǵan taqtatas janynan attandy.
Bul velomarafon Táýelsizdigimizdiń otyz jyldyǵy men Ybyraı atamyzdyń aıtýly mereıtoıyna arnaldy.
Velotop bes adamnan turady. Olardyń bári de áýesqoı veloshabandozdar. Mamandyqtary da ártúrli: muǵalim, jýrnalıst, zeınetker. Igilikti jobanyń bastamashysy – Ernat Melsuly, aǵylshyn tiliniń mamany jáne «Habar 24» telearnasyndaǵy shetel habarlarynyń sholýshysy. Buǵan deıin ol 2018 jyly 500 shaqyrymdyq «Astana – Aqtoǵaı», 2019 jyly 208 shaqyrymdyq «Qaraǵandy – Jańaarqa», 2020 jyly Abaı atamyzdyń 175 jyldyǵyna arnap 1088 shaqyrymǵa sozylǵan «Nur-Sultan – Jıdebaı» velosherýin uıymdastyrǵan.
Mazmundy saparǵa qatysýshylar Ybyraı atamyzdyń ónegeli ómiri men baı murasyn nasıhattaýǵa atsalysý, sonymen qatar, jurtshylyq arasynda salamatty ómir saltyn ustaný jáne tabıǵatty aıalaýǵa úndeýdi maqsat tutqan.
Velomarafonnyń uzaqtyǵy −750 shaqyrym, bir baǵytqa, ıaǵnı «Nur-Sultan − Qostanaıǵa» ǵana jasaıdy, sapar alty kúnge sozylady dep jobalanǵan.