Ýkraına premer-mınıstri Nıkolaı Azarov sherýshilerge kúsh qoldanylatynyn eskertken edi. Búgingi málimetter boıynsha, polısııa men ereýilshilerdiń arasynda oryn alǵan qaqtyǵystar kezinde qaza bolǵandar bar. Bul týraly Azattyg.org habarlady.
Ýkraına premer-mınıstri «eger arandatýshylar Kıevtegi áreketin toqtatpasa, sherýshilerge qarsy kúsh qoldanylady» degen eskertý jasaǵan edi.
Budan buryn qaqtyǵys kezinde eki ereýilshiniń qaza bolǵany jóninde aqpar taratylǵan edi. Keıinnen «Ýkraınskaıa pravda» gazeti 20-25 jas aralyǵyndaǵy jas jigittiń qaqtyǵys kezinde alǵan jaraqattarynan aýrýhanada kóz jumǵany týraly jazdy. Reseıdiń «Rossııa 24» telearnasyna suhbat bergen Azarov «Kıevte ótken aptadan beri demonstranttar men mılısııa jasaqtarynyń qaqtyǵysyp jatqanyna narazy» ekenin aıtqan. «Jaýapkershilik jaǵdaıdy osynsha ýshyqtyrǵan oppozısııalyq partııalardyń jetekshilerine artylady. Aldaǵy birneshe kúnde olar baǵyttaryn aıqyndap alýy tıis. Eger oppozısııa buzaqylar men ekstremısterdi, arandatýshylardy qoldasa, onda solarmen birge ekenin aıtsyn. Al eger olardy qoldamaıtyn bolsa, onda úkimetpen birlesip, qala kóshelerin arandatýshylardan tazartýǵa kirissin», – dedi Azarov. Sondaı-aq ol arandatýshylar óz áreketin toqtatpaǵan jaǵdaıda, úkimettiń olarǵa qarsy kúsh qoldanyp, zań aıasynda azamattaryn qorǵaýǵa haqy bar ekenin alǵa tartty.
21 qańtarda Reseı syrtqy ister mınıstri Sergeı Lavrov Ýkraınadaǵy jaǵdaıdyń «baqylaýdan shyǵyp bara jatqanyna» alańdaýshylyq bildirip, Kıevtegi shıelenistiń sozylyp ketkenine Ýkraına oppozısııasyn aıyptady.
Ýkraına parlamenti qabyldaǵan jańa zań boıynsha, ruqsat etilmegen jıyn ótkizgenderge salynatyn aıyppul kólemi men qamaý merzimi kóbeıdi. Azarov beıbit jıyn ótkizýdi shekteıtin zańdy «Eýropa zańnamalarynyń dál kóshirmesi» dep sıpattaıdy. BUU adam quqyqtary jónindegi joǵarǵy komıssary Navı Pılleı Ýkraına zańdary adam quqyqtary jónindegi halyqaralyq zańnamalarǵa saı kelmeıtinin aıtqan. Ol zańdardyń «azamattardyń oı-pikir erkindigin, beıbit jıyn ótkizý, aqparat alý erkindigin jáne azamattyq qoǵamnyń erkin jumys isteý quqyqtaryn buzady» dep, Ýkraına bıligin olardy joıýǵa shaqyrǵan. Kıevtegi jańa zańǵa qarsy shyqqan sherýshiler men polısııa qaqtyǵystary túnde de tolastamaı tur.
Ýkraına prezıdenti Vıktor Iаnýkovıch buǵan deıin oppozısııa jetekshilerin bılikpen dıalog qurýǵa jáne ymyralasýǵa shaqyrǵan.
Aıdar О́ribaev.
Derekkóz: Azattyg.org
Foto:Reuters.com