Qazaqstanda áýe kóligi ınfraqurylymyn jańǵyrtý jumystary josparly túrde júrgizilip jatyr, dep habarlaıdy Egemen.kz IIDM baspasóz qyzmetine silteme jasap.
Infraqurylymdy damytýdyń 2020-2025 jyldarǵa arnalǵan «Nurly jol» memlekettik baǵdarlamasy sheńberinde О́skemen qalasy áýejaıynyń ushý-qoný jolaǵy qaıta jańartylýda. Jobada jolaqtardy 300 metrge uzartý jáne áýe kemeleriniń qazirgi zamanǵy úlgilerin qabyldaý úshin jaryq-dybys jabdyqtaryn aýystyrý kózdelgen.
Jeke ınvestısııalar esebinen Shymkent qalasy áýejaıynyń jańa termınaly salynyp jatyr. Nátıjesinde termınal alańy 3,8 myń m2-den 35 myń m2-ge deıin keńeıip, ótkizý qabileti saǵatyna 150-den 2000 jolaýshyǵa deıin artady.
Jańa termınal halyqaralyq sapa jáne qaýipsizdik standarttaryna sáıkes keledi. Bul megapolıs turǵyndary men qonaqtary úshin jaıly jaǵdaı jasaıdy.
Batys Qazaqstan oblysynyń ákimdigi jeke ınvestısııalardy tarta otyryp, Oral qalasy áýejaıynyń aerovokzal keshenin jańǵyrtyp jatyr. Termınal aýmaǵy eki eseden astam ulǵaıtylyp, ótkizý qabileti saǵatyna 100-den 200 jolaýshyǵa deıin jetkiziledi.
Atalǵan jobalar boıynsha qurylys jumystaryn 2021 jyldyń sońynda jáne kelesi jyldyń birinshi jartyjyldyǵyna aıaqtaý josparlanǵan.
Alakól kóliniń týrıstik ortalyǵyna kólikpen baryp-qaıtýdy qolaıly etý maqsatynda Úrjar aýylynyń ushý-qoný jolaǵyn jáne aerovokzal ǵımaratyn rekonstrýksııalaý jumystaryn bıyl aıaqtaý josparlanýda. Sondaı-aq Úsharal qalasy áýejaıynyń ushý-qoný jolaǵyn, róldeý jolyn jáne perronyn rekonstrýksııalaý jumystary bastaldy.
Osy jobalardy iske asyrý áýejaılardyń jerústi ınfraqurylymyn jaqsartyp, qaýipsizdik jáne qyzmet kórsetý standarttaryn arttyrýǵa yqpal etedi.