Taıaýda Qyrǵyz eliniń astanasy Bishkekte qazaqstandyq ónerpazdardyń qatysýymen «Qyz-jigit. Sarmerden» atty televızııa formatyndaǵy baǵdarlamanyń túsirilimi ótti.
Rýhanı sharanyń ashylýyna elimizdiń Mádenıet jáne sport vıse-mınıstri Nurǵısa Dáýeshov, Qazaqstannyń Qyrǵyzstandaǵy elshisi Rápil Joshybaev jáne Qyrǵyz Respýblıkasy Prezıdenti ákimshiliginiń basshysy Súıinbek Qasmambetov pen sol eldiń Mádenıet, aqparat, sport jáne jastar saıasaty mınıstri Qaırat Imanalıev qatysyp, ónerpazdarǵa sáttilik tiledi.
Nurǵısa Dáýeshov óz sózinde eki el arasyndaǵy tatýlyqty, birlikti jáne ortaq qundylyqty ejelden óner arqyly nasıhattap kele jatqan maıtalmandarǵa toqtalyp, atalǵan ıgi dástúr joǵary deńgeıde jalǵasa beretinine senim bildirdi.
«Qyz-jigit. Sarmerden» – qyrǵyz telekórermenderi qyzyǵyp kóretin baǵdarlamanyń biri. Jobanyń negizinde qyzdar men jigitter halyq aýyz ádebıetinen maqal-mátel, jańyltpash, ázil aıtyp jarysady.
Konserttiń túsirilimine elimizdiń atynan dástúrli ánshiler – Klara Tólenbaeva, Ardaq Balajanova, Aıgúl Elshibaeva, Qazbek Ádikeı, Marat Súgirbaı, Beıbit Musaev, kúıshi Nurken Áshirov jáne «Saltanat» bı ansambli qatysty. Al qazylar quramynda Qazaqstan men Qyrǵyzstannyń halyq ártisi Altynbek Qorazbaev, Qazaqstannyń eńbek sińirgen qaıratkeri Elmura Jańabergenova boldy.
Baǵdarlamanyń alǵashqy kúni «Sarmerdendi» qazaq jigitteri men qyrǵyz qyzdary oınady.