Qazaqstan Respýblıkasynyń aýmaǵynda koronavırýstyq ınfeksııanyń paıda bolýy men taralýyna jol bermeý jónindegi vedomstvoaralyq komıssııanyń kezekti otyrysyna Qazaqstan men Katar arasynda turaqty áýe qatynasyn ashý máselesi talqylandy, dep jazady Egemen.kz.
Osylaısha QR IIDM Azamattyq avıasııa komıteti jáne Katar eliniń avıasııalyq bılik organdary eki el arasyndaǵy áýe qatynasy salasynda quqyqtyq baza qurý jáne keńeıtý jónindegi jumysynyń nátıjesinde «Qatar Airways» áýe kompanııasy 2021 jylǵy 15 qazannan bastap Doha jáne Almaty qalalary arasynda Qazaqstanǵa turaqty reıster oryndaýdy josparlap otyr.
Reıster sanıtarlyq-epıdemıologııalyq talaptardy qatań saqtaı otyryp jáne áýekompanııasynyń saıtynda jarııalanǵan kestege sáıkes A-320 ushaqtarymen aptasyna 2 reıs, dúısenbi jáne juma kúnderi oryndalady dep josparlanýda.
Eki el arasynda turaqty reısterdiń ashylýy Qazaqstan men Katar arasyndaǵy saýda-ekonomıkalyq, mádenı jáne týrıstik qatynastardy odan ári damytýǵa yqpal etedi.