Dúnıejúzi qazaqtary qaýymdastyǵy 8 kitapty jaryqqa shyǵardy
Biz osyǵan deıin de shetelderdegi qandastarymyzdyń shekara asyp kelgen shyǵarmalary atajurtta kezegimen kitap bolyp basylyp júrgendigi týraly talaı qalam terbegenbiz. Bul kúnde barsha qazaqtyń basyn bir jerge toǵystyrýda tynbaı tirlik atqaryp kele jatqan qaýymdastyqtyń kitaphanasy qomaqtylanyp keledi.
Dúnıejúzi qazaqtary qaýymdastyǵy 8 kitapty jaryqqa shyǵardy
Biz osyǵan deıin de shetelderdegi qandastarymyzdyń shekara asyp kelgen shyǵarmalary atajurtta kezegimen kitap bolyp basylyp júrgendigi týraly talaı qalam terbegenbiz. Bul kúnde barsha qazaqtyń basyn bir jerge toǵystyrýda tynbaı tirlik atqaryp kele jatqan qaýymdastyqtyń kitaphanasy qomaqtylanyp keledi.
Sonymen sársenbiniń sátinde Dúnıejúzi qazaqtarynyń qaýymdastyǵy tusaýyn kesken týyndylar QR Mádenıet jáne aqparat mınıstrligi Aqparat jáne muraǵat komıtetiniń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha jaryq kórip otyr. «Atajurt» baspa ortalyǵynan jaryqqa shyqqan kitaptardyń tusaýkeser rásimine kitap avtorlary men eldegi zııaly qaýymnyń kórnekti ókilderi qatysyp, bitken iske baıandylyq tilep, pikirlerin ortaǵa saldy.
Jyl saıyn júzege asyrylatyn dástúrli sharada alys-jaqyn shetelderdegi qazaqtardyń poezııa, proza janryndaǵy kórkem shyǵarmalary men ár eldegi qazaqtardyń tarıhy týraly ǵylymı-tanymdyq sıpattaǵy tarıhı zertteýler shyǵarylady. Bıyl da qaýymdastyq bul ıgi dástúrden jańylmaı, «Sheteldegi qazaqtar» serııasymen Qytaı men Mońǵolııa qazaqtarynyń ádebı jınaqtaryn jáne Mońǵolııa men Reseı qazaqtary týraly jańa kitaptardy jaryqqa shyǵaryp otyr.
Bul shyǵarmalardyń birqatary qalyń qazaq nazaryna alǵash ret usynylyp otyr. Sheteldegi qazaqtar arasynda esimderi birshama áıgili bul azamattardyń keıbiri ózderi turyp jatqan memleketterdiń quzyrly organdary tarapynan moıyndalyp, shyǵarmalary bilim berý baǵdarlamalaryndaǵy oqýlyqtarǵa da engizilgen kórinedi. Sonyń biri – Qaýsylhan Qozybaıuly. Ártúrli janrda qalam terbegen onyń «Islámniń qurdasy» atty áńgimesi jáne «Shaǵylǵan tósek» atty pesasy Qytaıdaǵy qazaq mektepteriniń ádebıet páni oqýlyqtaryna kirgen. Qalamgerdiń tańdamaly shyǵarmalar jınaǵy Mellat Rámettiń qurastyrýymen shyǵarylyp otyr. Onda joǵaryda atalǵan 2 týyndysynan bólek, «Jańa jaılaý» povesi men 6 áńgimesi, 1 pesasy jáne 30-ǵa jýyq óleńderi toptastyrylǵan. Al Botagóz Ýatqannyń «Atajurtqa jetken kósh» kitabynda HH ǵasyrdyń 90-jyldarynyń basynda Mońǵolııada atajurtqa bet alǵan alǵashqy kósh sóz bolady. Jalpy, 20 jyldan astam ýaqyttyń ishinde bul elden 100 myńdaı qazaq elge oralǵan bolatyn.
Budan bólek Arǵynbaı Jumajanulynyń «Balapan qaz», Arǵynbek Apashbaıulynyń «Jyr-ǵumyr» óleńder jınaqtary, Abdanbaı Bajaevtyń «Kún óz keýdeńnen týady» jáne О́nerhan О́gizbaıulynyń «Taǵdyr talqysynda» povester men áńgimeler jınaqtary shyǵyp otyr. Sondaı-aq, Mońǵol qazaqtarynyń azapqa toly kóshi týraly Sultan Táýkeıdiń «Arystardyń armany» derekti romany men Serikqalı Baımensheniń Reseı qazaqtary týraly «Dáneker» esse-áńgimeler kitaby bar.
Aınash ESALI,
«Egemen Qazaqstan».
ALMATY.