Elordadaǵy Ulttyq mýzeıde «Meniń Qazaqstanym» atty mádenı-bilim berý jáne ekspozısııalyq jobanyń ashylýy ótti.
Mazmundy is-sharanyń ashylýynda Ulttyq mýzeı dırektorynyń orynbasary Abaı Satybaldın atalǵan jobanyń mańyzyna toqtala kelip: «Árbir qazaq balasy ata-baba tarıhyna qurmetpen qarap, óz ultynyń ádep-ǵuryp, salt-dástúrin, ádebıeti men mádenıetin jetik bilýi kerek. Ulttyq qundylyqtar arqyly tárbıe alǵan urpaq – eńbekqor, ónerli, bilimdi, aqyldy, bolyp ósedi. Bizdiń «Meniń Qazaqstanym» atty jobany ashýdaǵy maqsatymyz – óskeleń urpaqtyń tárbıesi men damýyna erekshe kóńil bólý» dedi ol.
Jobadaǵy ekspozısııa qurylymy 10 bólimnen turady, barlyq bólim elimizdiń tereń tarıhy men tabıǵatyn balalarǵa qoljetimdi quraldarmen tolyq tanystyrady. Aqparat aımaǵy − Qazaqstannyń ınteraktıvti geografııalyq kartasymen, Uly Jibek jolynyń kartasymen jáne elektrondy dúńgirshekpen jabdyqtalǵan. Ekspozısııa «Qazaqstan geografııasy», «Qazaqstan tabıǵaty», «Qazaqstannyń arheologııalyq eskertkishteri» jáne «Uly Jibek joly», «Qazaqstannyń mádenıeti men etnografııasy» sekildi taqyryptardy qamtıdy.
Is-shara barysynda balalar oıyn arqyly el tarıhy, mádenıeti, tabıǵaty týraly mol maǵlumat alyp, ózderi arheologııalyq qazba jumystaryn júrgizdi, kıiz úıde bolyp, halqymyzdyń salt-dástúrine qatysty beınematerıaldardy tamashalap, ulttyq kıimmen sýretke tústi.