QR Qorǵanys mınıstrligi Jambyl oblysyndaǵy áskerı bazada bolǵan jarylystan qaza tapqandar sany 16-ǵa jetkenin málimdedi, dep jazady Egemen.kz.
«2021 jylǵy 7 qyrkúıekte Taraz qalalyq aýrýhanasynda 26 tamyzda Jambyl oblysyndaǵy oq-dáriler qoımasynda bolǵan órtti sóndirý kezinde alǵan jaraqattarynyń saldarynan 28349 áskerı bóliminiń áskerı qyzmetshisi 1983 jyly týǵan kapıtan Erlan Rysqulbekuly Qyrǵyzálıev qaıtys boldy.
Ol oq-dárilerdi saqtaý bóliminiń bastyǵy laýazymyn atqarǵan bolatyn. Qoımadaǵy órtti joıýǵa kirisken alǵashqylardyń biri boldy.
Qorǵanys mınıstrligi marqumnyń týystary men jaqyndaryna qaıǵyryp kóńil aıtady», dep jazylǵan resmı habarlamada.