Taskeskende – Mádenıet úıi, Aıtbaıda – mektep, Besterekte – ambýlatorııa ashyldy
Úrjar – burynǵy úsh aýdannan quralǵan úlken aýdan. Tarbaǵataı jotalarynan Alakólge, Qaraqoldan Baqty kedenine deıin sozylyp jatqan sýly-nýly, quıqaly óńir. Oblys ortalyǵy men iri qalalardan shalǵaı jatqan shekaralyq aýdan sońǵy ýaqytta sony ózgeristerge toly. Jýyrda aýdan ákimi Serik Zaınýldınniń az ýaqyttyń ishinde tyndyrymdy jumystar atqarǵanyna kýá boldyq.
Taskeskende – Mádenıet úıi, Aıtbaıda – mektep, Besterekte – ambýlatorııa ashyldy
Úrjar – burynǵy úsh aýdannan quralǵan úlken aýdan. Tarbaǵataı jotalarynan Alakólge, Qaraqoldan Baqty kedenine deıin sozylyp jatqan sýly-nýly, quıqaly óńir. Oblys ortalyǵy men iri qalalardan shalǵaı jatqan shekaralyq aýdan sońǵy ýaqytta sony ózgeristerge toly. Jýyrda aýdan ákimi Serik Zaınýldınniń az ýaqyttyń ishinde tyndyrymdy jumystar atqarǵanyna kýá boldyq.
Aıtalyq, Úrjar aýdanynda bir kúnniń ishinde birqatar áleýmettik mańyzy bar nysandar paıdalanýǵa berildi. Onyń qatarynda Taskesken aýylyndaǵy Mádenıet úıi, Aıtbaı aýylyndaǵy orta mektep jáne Besterek aýylyndaǵy dárigerlik ambýlatorııa bar.
Aldymen Taskesken aýylyndaǵy kúrdeli jóndeýden ótken Mádenıet úıiniń ashylýy ótti. On jeti jyl jóndeý kórmeı, iske alǵysyz bolǵan ǵımaratqa jergilikti bıýdjetten 91 mln. teńgeden astam qarjy bólingen eken. «Terme OST» JShS júrgizgen qurylys jumystary ótken jyldyń qarasha aıynda aıaqtalypty.
Bul ǵımarattyń ishinde halyqqa qyzmet kórsetý ortalyǵy, ardagerler alqasy, aýyl kitaphanasy, májilis zaly jáne t.b. áleýmettik-mádenı oryndar ornalasqan. Máselen, HQKO fılıaly arqyly turǵyndar ortalyqqa barmaı-aq qujatty bir kúnniń ishinde resimdep ala alady.
Mádenıet úıiniń syńǵyrlaǵan jańa májilis zalynda Qońyrsháýli aýyldyq okrýgi ákimi A.Júnisovtiń halyqpen eseptik kezdesýi ótti. Atalǵan kezdesýge oblys ákimi Berdibek Saparbaev ta qatysty.
Bul kúni 130 oryndyq orta mekteptiń ashylý saltanatyna qatysqan Aıtbaı aýylynyń turǵyndary da qýanyshqa bólendi. Jańa mektep zaman talabyna saı jaraqtandyrylǵan.
– Buryn oqýshylar kishkene ǵımaratta eki kezek boıynsha oqıtyn. Onda sport zaly men ashana joq bolatyn. Jańa mektepte munyń barlyǵy bar. Sonymen birge, shaǵyn ortalyq ta osynda ornalasqan. Bul – ata-analar úshin óte tıimdi. Oqýshylar bir aýysymda oqıdy, – dedi aýdandyq oqý bólimi kásipodaǵynyń jetekshisi Janbolat Jyńǵylbaev.
Mektepte oqýshylardyń biligin jetildirýge qajetti jaǵdaı jasalǵan. Tigin, aǵash jáne temir sheberhanalary, májilis zaly, kitaphana bar. Sonymen birge, 90 oqýshyǵa tegin ystyq as berýge arnalǵan ashana uıymdastyrylǵan.
Besterek aýylynda «Sharorda» JShS salǵan dárigerlik ambýlatorııa qurylysyna 150 mln. teńge jumsalǵan.
– «Salamatty Qazaqstan» baǵdarlamasy boıynsha, halyq densaýlyǵyn jaqsartý úshin materıaldyq-tehnıkalyq bazany nyǵaıtý qajet. Osyǵan oraı, oblys aýmaǵynda 29 dárigerlik ambýlatorııa salýdy josparlaǵanbyz. О́tken jyly 11 ambýlatorııa salyndy. Onyń ishinde 4 ambýlatorııa Úrjar aýdanyna tıesili. Munyń barlyǵy Elbasy Nursultan Nazarbaevtyń tikeleı qoldaýy arqyly júzege asyp jatyr, – dedi óńir basshysy.
2200 turǵyny bar Besterek aýylynyń halqy dárigerlik ambýlatorııa ashylǵanyna óte qýanyshty. Satybaldy Bismaqov, Tursynhan Qaısarqyzy, Jumabıke Qaıyrova syndy aýyl qarııalary der kezinde paıdalanýǵa berilgen ambýlatorııanyń, ásirese, jas balalar men zeınetkerler úshin qajet ekenin jetkizip, rızashylyqtaryn bildirdi.
«Dıplommen – aýylǵa!» baǵdarlamasy boıynsha aýylǵa kelgen Marına Sergıenko atalǵan mekemege jetekshilik etedi. Ambýlatorııa dárigeri jas maman retinde baspanamen de qamtylǵan.
Dıdar NURLANULY.
Shyǵys Qazaqstan oblysy,
Úrjar aýdany.