Tórtkúl dúnıeni tájtajal jaılaǵaly turmystan tarylǵan eldiń jaǵdaıyna beıjaı qaramaıtyn kásipkerler túrli áleýmettik jobalardy qolǵa alyp, shamasy jetkenshe sharapatty ispen aınalysýǵa bet bura bastady. Qolynan is keletin mundaı azamattarǵa memleket te kómegin aıap otyrǵan joq. Kásipkerlikti damytý ınstıtýttary arqyly qomaqty qarjy granttaryn bólip jatyr.
Máselen, Qostanaı oblysynda bıyl «Bastaý-Bıznes» jobasyna qatysýshylardyń birazy bıznes pen qaıyrymdy isti ushtastyrýdy kózdep otyr. Solardyń biri – Sarykól aýylynyń 25 jastaǵy turǵyny Nurjan Baqytkereev. Jas kásipker qaıyrymdylyq sharalaryn uıymdastyrýmen 19 jasynan bastap aınalysa bastaǵan. Buǵan deıin Nurjan elge janashyr aýyldastarynyń basyn qosyp, qarjy jınap, aýyr dertke shaldyqqan sábılerdiń emine dári-dármegin, turmysy tómen otbasylardyń azyq-túligi men kıimin alyp berý sııaqty sharapatty mol qaıyrymdy ispen aınalysyp kelgen. Nurjan Baqytkereev taıaýda kómekke muqtaj jandardy barynsha kóbirek qamtý maqsatynda Sarykól aýylynda áleýmettik ashana ashty. Munda aýdan ortalyǵynda turatyn turmysy tómen adamdar belgilengen keste boıynsha eki mezgil tegin tamaqtanady.
Qaıyrymdy kásipker ıgi bastamasyn júzege asyrý úshin «Bastaý Bıznes» jobasyna qatysyp, bilimin jetildirip, ózi jasaǵan bıznes jobany qorǵap shyqqan. Áleýmettik baǵyttaǵy bastamanyń sátti startap jobaǵa aınalýyna Qostanaı oblysy kásipkerler palatasynyń bilikti bıznes-treneri Gúlsin Abdýllına kómektesipti. Nátıjesinde, joba memleket tarapynan qoldaý taýyp, jas kásipker ózine qajet grant qarjysyna ıe bolǵan.
– Grantpen bólingen 583 myń 400 teńgege as úıge arnalǵan jabdyq satyp aldym. Jumysshy tabý máselesi de ońaı sheshildi, ózbek ashanasynyń qyr-syryn jaqsy meńgergen sheber aspaz jolyqty. Endi úı-jaıdy retke keltirý ǵana qaldy. Jóndeý jumystaryna demeýshi qarajat beremin dep ýáde berdi. Bizde ıgi iske janashyrlyq tanytyp, kómek berýge daıyn azamattar kóp, – dedi Nurjan.
Jas kásipkerdiń endigi maqsaty – ashana bıznesin damyta otyryp, qaıyrymdylyq sharalaryn uıymdastyrýdy jalǵastyrý. О́ziniń aıtýynsha, jańa ashylǵan ashana aqyly jáne tegin túrde eki baǵytta jumys isteıtin bolady. Muqtaj jandar úshin tegin tamaqtaný kestesi bekitilip, túsken tabystyń bir bóligi qaıyrymdylyqqa jumsalyp otyrady.
– Qazirdiń ózinde biz kópshiliktiń kúshimen 3-4 otbasyn aı saıyn azyq-túlikpen qamtamasyz etýdemiz. Ashanadan túsken tabystan basqa da otbasylarǵa úles bólip, múmkindiginshe kómek berip otyramyz. Bizge aýyr dertke ushyraǵan balalardyń ata-analary jıi keledi. Olar kóbine qymbat ota jasatýǵa qajet qarajat suraıdy. Mundaı jaǵdaıda kópshilikten jylý surap, qolymyzdan kelgenshe kómek jasaımyz, – deıdi jas kásipker.
Nurjan Baqytkereev qolǵa alǵan qaıyrymdylyq sharalaryna jubaıy men Sarykól meshitiniń jamaǵaty turaqty qoldaý kórsetip keledi.
Qostanaı oblysy