Qostanaı oblysynda óńirlik jedel shtab kúndelikti jarııalap otyratyn málimetter aımaqta indettiń taralý deńgeıi ótken aptanyń sońynda edáýir tómendegenin kórsetedi. Mysaly, 1 qyrkúıekte oblysta 237 adam COVID-19 juqtyrsa, ótken jumada bul kórsetkish 172-ge deıin azaıǵan. Alaıda oqý jyly bastalǵaly mektep partasyna qaıta otyrǵan balalardyń táj vırýsyn juqtyrýy jıilep bara jatqany alańdatady.
Oblystyq sanıtarlyq-epıdemıologııalyq baqylaý departamenti men densaýlyq saqtaý basqarmasy ókilderiniń aıtýynsha, jalpy pandemııa bastalǵaly óńirde koronavırýspen aýyrǵan 30 myńnan astam adam tirkelgen. Sonyń 2 myń 920-sy – 14 jasqa deıingi balalar.
Sońǵy kezderi balaýsa jastaǵy balǵyndardyń indet juqtyrýy kóbeıip bara jatqanyn Qostanaı oblysy bas sanıtarlyq dárigeriniń orynbasary Iýrıı Sevostıanov ta aıtyp otyr.
«Keshe ǵana Qostanaıdaǵy 40-tan astam synyp karantınge jabyldy. Eger buǵan deıin COVID-19 anyqtalǵan barlyq naýqastyń ishinde 5-10 baladan tirkelip otyratyn, ókinishke qaraı, qazir 20-25-ke jetti. Indet juqtyrǵan balalardyń jalpy táýliktik ósimi buryn 5-10% bolatyn, qazir – 11-den 15%-ǵa deıin. Bir sózben aıtqanda, balalar jıi aýyrady. Sondyqtan ata-analardan suraıtynymyz, sál ǵana bolsa da aýrý belgisi baıqalǵan balany mektepke jibermeý kerek», dedi Iý.Sevostıanov.
Qalalyq bilim bóliminiń basshysy Gúlsim Orazbaevanyń aıtýynsha, Qostanaıda sabaq bastalǵan bir jarym aptanyń ishinde 19 mekteptegi 57 synyp karantınge jabylǵan. Onyń ishinde, máselen, №7 jáne 16 orta mektepter bar. COVID-19-ben aýyrǵan oqýshy anyqtalǵan jaǵdaıda, synypty eki apta merzimge qashyqtan oqýǵa jiberedi. Qalǵan synyptar qalypty oqýdan qol úzbeıdi. Búginde 1 081 oqýshynyń naýqaspen baılanysta bolǵany belgili bolyp otyr.
«Eger synyptaǵy bala qaýipti vırýs juqtyryp alsa, onda epıdemıolog naýqas oqýshymen baılanysta bolǵandardy anyqtap, ol tizimdi emhanaǵa jiberýi tıis. Emhana dárigerleri bul balalardy tegin PTR-testileýden ótkizedi. Mundaı jaǵdaıda, synyp nemese balabaqshadaǵy top karantınge jiberiledi. Eger oqýshynyń ata-anasy koronavırýspen aýyrsa, onda karantınge balanyń ózi ǵana jiberilip, onyń synyby qalypsha oqı beredi», dedi bas sanıtardyń orynbasary.
Sondaı-aq, tumaý tıgen nemese tamaǵyn qarlyqtyryp alǵan balalar da sabaqtan bosatylady. Sanıtarlyq dárigerlerdiń aıtýynsha, eger synyptaǵy balalardyń 20-30%-y sýyq tıgizip alǵan jaǵdaıda, sabaq toqtatylýy tıis. Mundaı balalar bir apta boıy dáriger baqylaýynda bolady.
Qostanaı oblysy