Aýǵanstandaǵy Kandagar qalasynyń myńdaǵan turǵyny Talıban qozǵalysynyń buıryǵyna qarsy shyqty, dep jazady Egemen.kz Reuters agenttigine silteme jasap.
Vedomstvonyń málimetinshe, narazylyq bildirýshiler Kandagarda gýbernator úıiniń aldyna jınalǵan. Olar 3 myńǵa jýyq otbasyna armııa garnızony mańyndaǵy aýmaqty bosatý týraly buıryqqa narazy boldy. Sebebi kóbiniń úıi sol jerge salynǵan. Onda negizinen otstavkadaǵy armııa generaldary men Aýǵanstan qaýipsizdik kúshteriniń basqa músheleriniń otbasy turady.
Sondyqtan myńdaǵan aýǵandyq Kandagar kóshelerine shyǵyp, aýmaqty májbúrli túrde bosatýǵa narazylyq bildirdi. Adamdar qarjylyq qıyndyqtarǵa shaǵymdanyp, tipti azyq-túlik alýǵa shamasy kelmeıtinin aıtady.
Ázirge tálibterdiń narazylyq tanytýshylarǵa kúsh qoldanǵany týraly aqparat joq.
«Talıban» kóshbasshylary kez kelgen qııanat jaǵdaıyn tergeýge ýáde berdi, biraq demonstranttarǵa narazylyq aksııasyna shyǵar aldynda ruqsat suraýdy buıyrdy.