Dýshanbede Qazaqstan men Tájikstan syrtqy saıası vedomstvosy taldamalyq qurylymdary basshylarynyń saıası konsýltasııasy ótti, dep jazady Egemen.kz.
Is-shara Prezıdent Q. K. Toqaevtyń 2021 jyly mamyr aıynda Tájikstanǵa resmı saparynda qabyldanǵan eki eldiń syrtqy saıası vedomstvolary arasyndaǵy 2021-2023 jyldarǵa arnalǵan yntymaqtastyq baǵdarlamasyna sáıkes uıymdastyryldy.
Qazaqstandyq delegasııany SIM Syrtqy saıası taldaý jáne boljamdaý departamentiniń dırektory Erlan Shamıshev, tájik tarapyn TR SIM strategııalyq zertteýler basqarmasynyń bastyǵy Vafo Nııatbekzoda basqardy.
Kezdesý barysynda dıplomattar Aýǵanstandaǵy qazirgi ahýaldyń jáne jalpy óńirdegi jaǵdaıdyń odan ári damý ssenarıılerin talqylady. Qazirgi zamanǵy transshekaralyq syn-tegeýrinder men qaýip-qaterlerge qarsy is-qımyl máseleleri boıynsha pikir almasty. Taraptar Aýǵanstandaǵy belgili saıası ózgeris, zańsyz kóshi-qon men bosqyndar aǵymynyń, esirtki trafıgi men radıkaldy dinı kózqarastardyń taralýyna baılanysty óńir qaýipsizdigine qater tóndiredi degen pikirge keldi.
«Bul eldegi áleýmettik quldyraý men gýmanıtarlyq apattyń qaýpin týdyrýy múmkin», dep jazylǵan vedomstvonyń baspasóz habarlamasynda.
Kelissózder qorytyndysynda halyqaralyq kún tártibindegi ózara qyzyǵýshylyq týdyratyn barlyq máselede dıalog pen pikir almasýdy jalǵastyrý týraly ýaǵdalasty. Taraptar ortaq ustanymdy shoǵyrlandyrý maqsatynda Aýǵanstandaǵy jaǵdaıdy baqylaýdy jalǵastyrýdy jáne eki eldiń halyqaralyq arenadaǵy bastamalaryn ózara qoldaýǵa daıyn ekenin rastady.
Sonymen birge, QR SIM Syrtqy saıası taldaý jáne boljamdaý departamentiniń dırektory Erlan Shamıshev Tájikstan Respýblıkasy Prezıdenti janyndaǵy Strategııalyq zertteýler ortalyǵynyń óńirlik qaýipsizdik problemalaryn zerdeleý basqarmasynyń basshysy Hýrshed Dodıhýdoevpen kezdesti. Taraptar Aýǵanstan men óńirdegi ahýal jóninde pikir almasty.