Reseıdiń Chelıabi oblysynda 36 myńdaı qazaq turamyz. Qazaqstanda, atajurtymyzda qandaı jaqsy ister bolsa, soǵan qulaǵymyzdy tigip, qýanyp otyramyz. Dúnıejúzi qazaqtarynyń sońǵy quryltaıynda Astana qalasyn kórýdiń sáti túsken. Dalanyń ortasyndaǵy sylanǵan totyqustaı qalanyń sulýlyǵyna, óz qandastarymyzdyń qonaqjaılyǵyna, eldiń alǵa qaryshtap damyp bara jatqan qadamyna qýanyp qaıtqanbyz. Qazaqstan Prezıdenti Nursultan Nazarbaevtyń halyqqa bıylǵy Joldaýyn ǵalamtordan taýyp alyp, oqyp shyqtym. Tek men emes, ózimniń otbasym, qoǵamdyq uıym jumysyna belsene qatysatyn qazaq jastary da tanysty.
О́te mańyzdy saıası qujattaǵy aıtylǵan máseleler meni tańǵaldyrdy. Bul qujattan kóbine tek mamandardy, saıasatkerler men ekonomısterdi, memlekettik qyzmetkerlerdi ǵana qyzyqtyratyn saıası-ekonomıkalyq, qarapaıym adamdarǵa aýyr qabyldanatyn sandar men máseleler jıyntyǵy emes, bir jyly ákelik ósıetti uǵynǵandaı boldym. Ásirese, «Máńgilik El» ıdeıasy meni qatty qyzyqtyrdy. Ulttyq basymdyqtarǵa mán berý óte mańyzdy. Jahandanýdyń ıirimine túsip, alǵa umsyna berý emes, damýdyń ár qazaqstandyq úshin mán-maǵynasyn aıqyndap bergen qujat eken. О́ndiristegi, ishki jalpy ónimge, jalpy ekonomıkaǵa baılanysty asqaq kórsetkishterdiń ómirde shyndyqqa, aqıqatqa aınalaryna senip otyrasyń. Tarıhı jurtymyzdaǵy damýdyń osyndaı tamasha jolyna biz syrtta júrsek te tilekshimiz.
Joldaýdaǵy áleýmettik salada atqarylar jumystarǵa qalaı ishiń jylymaıdy, qalaısha qyzyqpaısyń?! Mysaly, múgedekterge baılanysty aıtylǵan: «Múmkindigi shekteýli azamattarymyzǵa kóbirek kóńil bólý kerek. Olar úshin Qazaqstan kedergisiz aımaqqa aınalýǵa tıis. Bizde az emes ondaı adamdarǵa qamqorlyq kórsetilýge tıis – bul ózimizdiń jáne qoǵam aldyndaǵy bizdiń paryzymyz. Búkil álem osymen aınalysady. Múmkindigi shekteýli adamdar turmystyq qyzmet kórsetý, taǵam ónerkásibi, aýyl sharýashylyǵy kásiporyndarynda jumys isteı alady. Men barlyq kásipkerlerge olardy jumysqa ornalastyrýǵa kómektesińizder dep taǵy da aıtqym keledi», degen joldar kóńil tolqytady.
О́mir bolǵan soń, múgedek jandar barlyq qoǵamda, barlyq elde bar. Biraq olar týraly mundaı aıqyn aıtylǵan tapsyrma, aıqyn jospar bola bermeıtini taǵy bar. Bilim, ǵylym týraly aıtylǵan tustar bizdiń jastardy qyzyqtyrdy. Stıpendııanyń kóbeıetini naqty kólemine, jylyna deıin aıtylǵan. Bul jastardy jigerlendireri, olardyń bolashaqqa degen senimin nyǵaıtary sózsiz.
Mine, Nursultan Nazarbaevtyń «Qazaqstan joly – 2050: bir maqsat, bir múdde, bir bolashaq» atty Joldaýy Qazaqstan damýynyń baǵytyn aıqyndasa, syrt kózge onyń úırener tusy da kóp eken. Osy aıtylǵan máseleler júzege assyn dep tileımiz.
Qarlyǵash IGEMBAEVA,
«Birlik» qazaq ulttyq-qoǵamdyq
birlestiginiń tóraıymy.
Reseı Federasııasy,
Chelıabi qalasy.