Qys kelmeı-aq qaltyrap otyr

Kókshetaýdyń kúzi bıyl sal­qyn. Bozqyraý da ádettegiden erte tústi. Keıbir kúnderi kúndiz sál shýaq bolǵanymen, tún sýyq. Onyń ústine óńmenińnen ótetin sýyq jel kún saıyn údete soǵýda. Jylý berilmegen kópqabatty úılerdiń turǵyndary qońyr kúzde-aq jaýraı bastady. «Kók­she­taý jylý» kommýnaldyq kásip­ornynyń bas ınjeneri Da­nııar Aqybaevtyń aıtýyna qa­raǵanda, jazda qalanyń bý qa­zandyqtaryna jóndeý jumys­tary júrgizilgen. Jylý qala ákiminiń tapsyrmasy boıynsha 21 qyrkúıekten bastap ishinara berile bastaǵan. Alǵashqy on kún boıy jylý magıstraliniń boıyndaǵy kem-ketik jóndelipti. Jıyrma táýlikke jetetin 38,4 myń tonna kómir bar.

– Oblys ortalyǵyndaǵy 912 kóp qabatty turǵyn úıdiń 897-sin jylý júıesine qostyq, – deıdi kommýnaldyq kásiporynnyń jedel basqarý qyzmetiniń basshysy Valerıı Mıngýlov, – bilim jáne densaýlyq saqtaý salasy mekemelerine jylý berile bas­tady. Kópqabatty 6 úıde jylý eseptegish quraly joq. 9 qabatty turǵyn úıdiń jertólesi sýǵa tolyp tur. Saryarqa shaǵyn aýdanynda avtomattandyrylǵan jylý beketteri qoıylǵan. Bul jerde jumys isteýge tıisti IT mamandary jetispeıdi. Múlik ıeleriniń birlestigi men páter ıeleri kooperatıvteriniń basshylary qajetti mamandy izdep tabý­ǵa asyǵatyn emes. Bul sha­ǵyn aýdannyń keıbir turǵyn úı­lerinde jylý eseptegishteri de joq. Demek, bul úılerge jylý berilmeıdi.

Sondaı-aq Vasılkovka, Birlik shaǵyn aýdandarynyń №1, 9, 33 jáne 35 kópqabatty turǵyn úılerinde, «Jansaıa» turǵyn úı ke­sheninde, kottedjderge ornalasqan balabaqshalarda jylý joq. Sebep, jylý esep­tegish quraldary qoıyl­maǵan. Bul másele jaz boıy oılas­ty­ryl­maǵandyqtan, taıaý arada sheshile qoıady deý qıyn. «О́rken» balabaqshasy da jy­lýǵa jarymaı otyr. Qys qaba­ǵyn túksıtip kele jatqanda, álde­qashan tozyǵy jetken jylý qubyrlary endi aýysty­rylyp jatyr. Jylýdyń tólemaqysy da jyldar boıy tólenbeı, qor­dalanyp qalǵan. Biz qaryz­dyń qanshalyqty ekenin bilgimiz kelip «Kókshetaý jylý» kommýnaldyq kásipornynyń basshylarynan qansha márte suraǵanymyzben, mardymdy jaýap ala almadyq. Qala basshylary aıtýǵa ruqsat etpeıdi deıdi. Qaıta jahanǵa jar salyp boryshkerlerden qordalanyp qalǵan qaryzdy óndirip alsa, táp-táýir qarajat jınaqtalyp, ózderiniń qoldary uza­ryp qalmaı ma?! Sol qara­jatqa jaz boıy jóndeý jumys­taryn júrgizýge ábden bolar edi. Qazir qazandyqtan jylý aı­daıtyn sorǵylardyń tozyǵy jetkendikten, qysym jetkiliksiz bolyp tur.

– Buryn bizdiń shaǵyn aýdan qazandyqqa tikeleı qosylýshy edi, – deıdi «Altyn» páter ıeleri kooperatıviniń tóraǵasy Adaı Esenturov. Bul júıe nege ekenin kim bilsin, jazdygúni buzylyp tastaldy. Bizdiń kooperatıvke qarasty kópqabatty 35 turǵyn úı ortalyq jylý júıesiniń qaıtqan jelisine qosyldy. Qysym bol­maǵandyqtan, páterlerge jylý bere almaı otyrmyz.

Kooperatıv tóraǵasymen birge jertólege túsip kórdik. Jylý berý júıesinde qanjylym ǵana jylý bar eken. Qysym bolmaǵandyqtan, sonyń ózi páter­lerge kóterile almaı tur. Qys kelmeı-aq qaltyrap otyrǵan birer páterge bas suqtyq. Tur­ǵyn­­dar aryz-shaǵymdaryn aı­typ-aq jatyr.