Memleket basshysy Qasym-Jomart Toqaevqa Jambyl oblysynyń ınvestısııalyq jobalary tanystyryldy, dep habarlaıdy Egemen.kz.
Qasym-Jomart Toqaev Jambyl oblysyna jumys sapary aıasynda aımaqtyń áleýmettik-ekonomıkalyq ahýaly, ınvestısııalyq jobalardyń júzege asyrylýy jáne Taraz qalasynyń damý perspektıvalary týraly oblys ákimi Berdibek Saparbaevtyń esebin tyńdady.
Berdibek Saparbaev Prezıdentke «Halyq birligi jáne júıeli reformalar – el órkendeýiniń berik negizi» atty Joldaýda berilgen tapsyrmalardyń oryndalý barysy týraly aqparat berdi.
Bıylǵy segiz aıdyń qorytyndysy boıynsha ekonomıkanyń negizgi baǵyttarynda damýdyń oń qarqyny saqtalǵan, ónerkásip, aýyl sharýashylyǵy, qurylys, kólik, saýda, baılanys salalarynda ósim baıqalady.
Salyq túsimderi men eńbekaqy artqan. Osy merzim ishinde 372,9 myń sharshy metr turǵyn úı paıdalanýǵa berilip, 232,6 mıllıard teńge kóleminde ınvestısııa tartylǵan.
Kásipkerlikti qoldaýdyń 2025 jylǵa deıingi baǵdarlamasy aıasynda Jambyl oblysynda quny 2,5 trıllıon teńge bolatyn 107 ınvestısııalyq jobany iske asyrý josparlanyp otyr. Memleket basshysyna bıyl quny 171 mıllıard teńge bolatyn 31 jobanyń júzege asyrylatyny, sondaı-aq 8 aıdyń ishinde 78,2 mıllıard teńge kólemindegi qarjyǵa 13 jobanyń iske qosylǵany jóninde baıandaldy.
Oblys ákiminiń aıtýynsha, «Alqaptan sórege deıin» jobasyn júzege asyrýǵa 1 mıllıard teńge bólingen. О́ńirde 31 áleýmettik pavılon ashylǵan. Taǵy 12 nysan ashý josparlanyp otyr.
Oblys ákiminiń esebin tyńdaǵan Prezıdent óńirdi damytýdyń basym baǵyttaryn belgilep berdi.
«Baıandamańyz qabyldandy. Jalpy bul oblys qarqyndy damyp kele jatyr. О́sim bar. Sheshilmegen máseleler de bar. Onsyz bolmaıdy. Usynystaryńyzdy qarastyryp, máselelerdiń oń sheshilýin ózim baqylaýǵa alamyn.
Kelesi jyldyń basynda oblysqa kelý josparymda bar. Sol kezde naqty máselelerdi pysyqtaımyz. Al vaksına jóninde aıtatyn bolsaq, Qazaqstan dúnıejúzindegi óz vaksınasyn oılap tapqan eń ozyq memleketterdiń qataryna qosyldy. Bul Jambyl oblysymen tikeleı baılanysty. Sondyqtan qutty bolsyn. Atqaryp jatqan eńbekterińizge rızashylyǵymdy bildiremin», dedi Qasym-Jomart Toqaev.