Jer jánnaty Jetisýdyń kindik qalasy – Taldyqorǵan teatry 1975 jyly Ǵabıt Músirepovtiń «Qozy Kórpesh-Baıan sulý» tragedııasy boıynsha qoıylǵan spektaklimen shymyldyǵyn ashqan edi.
Búginde óńirdegi qazaq óneriniń qara shańyraǵyna aınalǵan bul teatr 39 jyldan beri halyqqa minsiz qyzmet etip keledi. 2000 jyly teatrǵa Qazaqstannyń halyq ártisi, Memlekettik syılyqtyń laýreaty Bıken Rımovanyń aty berildi. «Búgingi tańda teatrymyzda 86 adamnyń 27-si shyǵarmashylyq topty quraıdy. Olardyń bireýi Qazaqstannyń halyq ártisi bolsa, taǵy bireýi Qazaqstannyń eńbek sińirgen ártisi. Al Qazaqstannyń eńbek sińirgen qaıratkeri úsheý. О́ner ıeleriniń arasynda «Qurmet», «Parasat» ordenderiniń, «Eren eńbegi úshin» medaliniń ıegeri bar. Teatr ártisteri B.Rımovanyń 90, Muqan Tólebaevtyń 100 jyldyǵyna arnalǵan mereıtoılarda el esinde qalǵan kórinisti kórsetip qana qoımaı, múmkindikterge oraı ózge óńirlerge at izin salyp halyq qoshemetine bólenýde», – dedi Almaty oblystyq mádenıet, muraǵattar jáne qujattama basqarmasynyń basshysy Rahmet Esdáýletov. Árıne, jetistiktermen qatar, alda atqarýǵa tıis teatr ujymynyń ózekti máseleleri de barshylyq. Sonyń birin atap aıtar bolsaq, teatr ǵımaraty 1980 jyly qurylysshylardyń Mádenıet úıi bolyp salynǵan eken. Sondyqtan da kásibı teatrdyń basty talaptaryna saı kelmeıdi. Jańa teatr ǵımaratyn salý qajettigi týyndap otyr. Bul bir. Ekinshiden, jyl saıyn daryndy qyzmetkerlerge respýblıkalyq, halyqaralyq deńgeıdegi ártúrli granttar men arnaýly stıpendııalar taǵaıyndalyp, óner ujymynyń sheteldermen mádenı baılanysyn nyǵaıtý úshin halyqaralyq festıvalderge qatysýǵa qoldaý jasalyp jatsa quba-qup. Taǵy bir ózekti másele, jas mamandardyń baspanasy bolyp otyr. Ipoteka alýǵa olardyń qazirgi aılyq jalaqysy jetpeıdi. Dál osy tusta oraıy kelgen bir usynys, aılyq tabysy mınıstrlikke qarasty teatr akterleriniń alatyn kategorııalarymen teńestirilý joldary qarastyrylsa jón bolar edi. Teatrdyń 40 jyldyǵy taıap keledi. Osyǵan oraı, ártisterge tıisti oryndar tarapynan qoldaý kórsetilse ónerdiń mereıi ósip, abyroıy artar edi.Nurbol ÁLDIBAEV,
«Egemen Qazaqstan». Almaty oblysy.