Elbasynyń «Qazaqstan joly – 2050: bir maqsat, bir múdde, bir bolashaq» atty bıylǵy Joldaýynda bilim jáne ǵylym júıesin damytý tóńireginde aýqymdy maqsat-mindetter qoıyldy. Máselen, keleshekke baǵdar beretin bul qujatta: «Bizdiń bolashaqqa barar jolymyz qazaqstandyqtardyń áleýetin ashatyn jańa múmkindikter jasaýǵa baılanysty. XXI ǵasyrdaǵy damyǵan el degenimiz – belsendi, bilimdi jáne densaýlyǵy myqty azamattar. Bul úshin biz ne isteýimiz kerek?» degen joldar bar. Memleket basshysy Qazaqstan halqyna osyndaı saýal qoıa otyryp, oǵan bir mezgilde jaýap ta qata bildi, el aldynda aýqymdy jumystar turǵandyǵyna toqtaldy.
Al ol maqsat-mindetter qandaı? Birinshiden, olardyń negizinde elimizdiń bilim berý júıesin oza damyǵan elderdiń bilim berý standartymen sáıkestendirý ıdeıasy jatyr. Osyǵan sáıkes, Elbasy 2020 jylǵa qaraı, Qazaqstandaǵy 3-6 jas aralyǵyndaǵy balalardyń mektepke deıingi bilimmen tolyqtaı, ıaǵnı 100 paıyzǵa deıin qamtylýy tıistigin atap ótti. Sondaı-aq, sol jas jetkinshekterge zamanaýı oqytý ádistemeleri men oqý quraldaryn, jańa baǵdarlamalar usynýdyń, Qazaqstandaǵy orta bilim berý júıesindegi barlyq jalpy bilim beretin mektepterdi Nazarbaev Zııatkerlik mektepterindegi bilim berý júıelerimen teńestirýdiń mańyzy týraly aıtyldy. Prezıdent nazarynan orta bilim berý oshaqtaryndaǵy orynnyń jetispeýshiligi máselesi de syrt qalmady. Máselen, aldaǵy 3 jyldyq merzim ishinde, ıaǵnı 2017 jylǵa qaraı Qazaqstannyń jer-jerindegi eldi mekenderdegi barlyq mektepterdi eki aýysymmen oqytýǵa kóshirý úrdisi júrgiziletin bolady. Demek, aldaǵy ýaqytta qolǵa alynatyn bul ıgi isterdiń barlyǵy – memlekettiń alǵa jyljýy, qaryshtap damýy tek adamı kapıtalmen, onyń sapasymen ólshenetininiń bir aıǵaǵy bolyp otyr. Al bul maqsatqa qol jetkizý úshin elimizde kásibı mamandar kóptep shoǵyrlanýy kerek.
Prezıdent damyǵan elderdiń qataryna damyǵan ǵylym arqyly ǵana qosylýǵa bolatynyn, ol úshin bilim berý júıesin jetildirýge, adam kapıtalyn damytý men ǵylymǵa negizdelgen ekonomıkany qalyptastyrýǵa mán beriletinin jetkizdi. Máselen, adam kapıtaly uǵymyna kelsek, buryn bul uǵym tek jeke adamnyń boıynan kórinetin izgi qasıettermen, rýhanı qundylyqtarmen ólshenip kelse, qazirgi tańda ol qandaı da bir eldiń joǵary ekonomıkalyq kórsetkishiniń belgisi retinde qabyldanyp júr. Mine, sol sebepti, de búginde bilim men ekonomıka egiz uǵymǵa aınaldy. Demek, Memleket basshysy aıtqandaı, damyǵan memleket bolý úshin bilim men ǵylymdy, aqyl men parasatty ekonomıkaǵa negizdeý – adam kapıtalynyń ózegi. Al adam kapıtaly kez kelgen eldi órge de jeteleıdi, alǵa da bastaıdy.
Kúlıza MOLDAShEVA,
№39 mekteptiń muǵalimi.
AQTО́BE.