«Shoq shaınap, ot búrikken Qasymdaıyn» dep tebirengen jyr dúldúli Muqaǵalı Maqataevtyń týǵan kúni elordadaǵy Qazaqstan-Reseı ýnıversıtetinde atalyp ótti. Oǵan uıytqy bolǵan osy bilim ordasyndaǵy «Abaıtaný» ortalyǵy edi. Keshke «Abaı nury» ónerli jastar klýby da óz úlesterin qosty.
«Jyrsyz meniń ómirge ne keregim, Jyrdan basqa jurtyma ne beremin» dep jyrymen halqyn qanattandyryp kele jatqan aqıyq aqynnyń óleńderine jazǵan T.Raqımov, A.Esmuhanov, E.Tilepberdıev, K.Jalǵasov ánderin belgili óner sheberleri E.Qasymov, M.Sháıkenov, N.Arzamasov naqyshyna keltirip oryndady. «Daýysy asqaq, úni keń» dep aqyn B.Tobaıaqov óleń arnady.
«Abaıtaný» ortalyǵynyń dırektory A.Muhametqalıqyzy Muqaǵalıdyń «Osy men sirá da, ólmeıtin shyǵarmyn, Sál ǵana myzǵyp ap, qaıtadan turarmyn» degen eki jol óleńin eske túsirip, Abaıdyń rýhanı izbasarlaryn árkez jastarǵa jetkizip otyrýdy maqsat etkenin eske saldy. Al Qazaqstan-Reseı ýnıversıtetiniń rektory, UǴA korrespondent-múshesi Marat Moldahmetov eki eldiń arasyndaǵy rýhanı sabaqtastyqty jalǵastyrý nıetinde joǵarydaǵydaı ortalyqtyń jumys istep jatqanyn, sonymen birge, ol stýdentterge óz talanttarymyzdy tanytý isine de úles qosyp otyrǵanyn Qasym, Muqaǵalı, Qadyr, Tumanbaı sekildi qazaq poezııasynyń jaryq juldyzdarynyń ekinshi ómirin jańǵyrtý úrdisi qalyptasa bastaǵanyn tilge tıek etti.
Shynynda, ultymyzdyń maqtanyshyna aınalǵan alyptaryn árkez osylaı eske túsirip otyrsaq, utylmasymyz anyq. Tipti rýhanııattyń aıtýly tulǵalaryn týǵan kúninde, ne mereıtoıynda eleý úrdisin, ár jyl saıyn poezııa keshterin jıi ótkizý úlgisimen jalǵastyrsaq utylmas edik. Bul jas urpaqtyń jaqsylaryn tanyp-bilýine múmkindik berer edi. Irgeles jatqan Reseı eli mundaı dástúrdi úzbeı jalǵastyryp keledi. Sonyń bir mysaly, az ǵumyrynda az mura qaldyrsa da kópteı kórip Nıkolaı Rýbsovqa arnalǵan jyl saıynǵy poezııa maýsymy sonyń dáleli dep bilemiz. Osyndaı úlgi ornyqsa, kózi tirisinde «... sirá da, ólmeıtin shyǵarmyn!» dep ketken Muqaǵalı sózi aqıqatqa aınala bermek.
Súleımen MÁMET,
«Egemen Qazaqstan».