Qadaǵalaý qataıady

Keshe keshke qaraı Premer-Mınıstr Serik Ahmetov Úkimet múshelerin shuǵyl jınap, teńgeniń baǵamy ózgerýine qatysty qolǵa alynatyn is-sharalar jaıyn talqylady. Tez shaqyrylǵan jıynǵa búkil mınıstrlermen qatar, barlyq oblys ákimderi jáne Almatydan Ulttyq bank tóraǵasy Qaırat Kelimbetov onlaın rejimde qatysty. «Ulttyq Bank búginnen bas­tap jańa aıyrbas baǵamyn jarııalady. Bul másele halyqtyń jaǵdaıyna keri áserin tıgizbes úshin tez arada tıisti sharalar qabyldaımyz. Eń aldymen, elimizde baǵanyń negizsiz ósýine jol  bermeý kerek. Bul, ásirese, kúndelikti taýarlardyń baǵasyna qatysty bolyp otyr. Biz mine, osy máseleni jan-jaqty taldap, tıisti sheshimder qabyldaıtyn bolamyz», dep bastaǵan S.Ahmetov bul másele kúndelikti qajetti taýarlardyń baǵasyna aıryqsha qatysty ekenin qadap aıtty. Sonymen qatar, ol Úkimettiń ekonomıkalyq blogy men Ulttyq bank qalyptasqan jaǵdaıdy shuǵyl baǵalap, ekonomıkanyń josparlanǵan ósiminiń kólemin qamtamasyz etý turǵysynda usynystar engizýdi tapsyrdy. Odan ári sóz kezegin  Ulttyq bank tóraǵasy Q.Kelimbetovke berdi. Ulttyq bank basshysy valıýta aıyrbastaý baǵamynyń jańa deńgeıi 1 AQSh dollaryna 185  teńge bolyp eseptelgenin eske sala otyryp, onyń sebep-saldaryn taǵy bir túsindirip ótti. Osyǵan oraı aldaǵy ýaqytta halyq onyń jaǵymsyz áserin sezinbes úshin Ulttyq bank tarapynan qolǵa alynyp jatqan sharalarmen bólisti. Budan ári mınıstrler, máselen, Ekonomıka jáne bıýd­jettik josparlaý mınıstri Erbolat Dosaev, Aýyl sharýa­shylyǵy mınıstri Asyljan Mamytbekov, Eńbek jáne halyqty áleýmettik qorǵaý mınıstri Tamara Dúısenova, Munaı jáne gaz mınıstri Uzaqbaı Qarabalın sóz sóılep, oryn alǵan  jaǵdaıǵa baılanysty týyndaǵan  máselelerdi talqylady. Munymen qosa, birneshe oblys ákimderi men Almaty qalasy ákimi óz óńirlerindegi qazirgi jaǵdaıdy baıandady. Biraz talqylaǵan soń, Úkimet basshysy otyrysty qory­tyndylap, tıisti organdarǵa arnaıy tapsyrmalar júktedi. Halyq arasynda dúrbeleń men kúndelikti qajetti taýarlardyń baǵa ósimine jol bermeý úshin barlyq sharalardy qabyldaý qajettigin basa aıtqan S.Ahmetov ulttyq valıýtamyzdyń jańa baǵamyna baılanysty elimizdiń áleýmettik-ekonomıkalyq damý boljamyn qaıta esepteýdi tapsyrdy. «Ákimder halyq arasynda túsindirý jumystaryn júrgizýi qajet. Sonymen birge, jedel jumys tobyn qurý jáne baǵa ósimine jol bermeý sharalaryn qabyldaý qajet.  Bul rette turaqtandyrý qorlarynyń resýrs­taryn tartý, saýda núktelerin taýar­men qamtamasyz etip, olar­dyń jumystaryn erekshe baqylaýǵa alý kerek»,  dedi ol. Úkimet basshysy saýda uıymdarymen jáne jumys tobymen birlesip, dúkender men saýda ortalyqtaryndaǵy baǵanyń negizsiz ósýin tekserýdi qatań tapsyrdy. «Iаǵnı, baǵanyń negizsiz qaıta qaralýy jergilikti atqarýshy organdarmen baqylanýy tıis», dedi Premer-Mınıstr. S.Ahmetov kúndelikti azyq-túlik baǵasymen qosa, benzın baǵasyna da basa nazar aýdardy. Sebebi, azyq-túlik baǵasy kóbine tasymalǵa qatysty benzın baǵasymen tyǵyz baılanysty ekeni ras. Osyǵan oraı Úkimet basshysy Munaı jáne gaz mınıstrligine Tabıǵı monopolııalardy retteý agenttigimen birlesip, qor taýsylǵansha  AI-92 benzınine baǵany ósirmeý úshin barlyq  sharalardy qabyldaýdy tapsyrdy. Bul turǵyda S.Ahmetov janar-jaǵarmaı quıý stansalarynda baǵa negizsiz kóterilgen jaǵdaıda olar tıisti jaýapkershilikke tartylatynyn atap ótti. Otyrys barysynda óńir ákimderi keıbir valıýta aıyrbastaý pýnktterinde teńgeniń AQSh dollaryna shaqqandaǵy baǵamynyń shekti deńgeıi joǵary ekenin aıtqan bolatyn. Osyǵan baılanysty S.Ahmetov jer-jerdegi valıýta aıyrbastaý pýnktterin qatań qadaǵalaýǵa alýdy tapsyrdy. «Bul másele barlyq ákimderge qatysty,  ıaǵnı óńirlerde Ulttyq banktiń fılıaldarymen birlese jedel jumys toptaryn qurý kerek. Bir-eki kúnde bul jaǵdaı bir izge túsedi. Alaıda, Ulttyq banktiń qaýlysy oryndalýy úshin valıýta aıyrbastaý pýnktterinde bolyp jatqan úderisterge shuǵyl áreket etýi turǵysynda osyndaı jedel jumys toptary qajet», dedi Úkimet basshysy. Osy oraıda S.Ahmetov, eń bastysy, valıýta aıyrbastaý pýnktteri halyqty dúrliktirmeýi tıis ekenin qadap aıtty. «Ulttyq banktiń sheshimi shyǵaryldy, valıýta bar, aıyrbastaý pýnktteri turaqty jumys istep tur. Bizdiń maqsat –atqarý jumystaryn jergilikti jerlerge deıin jetkizý. Sondyqtan ákimder osy máselelerdi Ulttyq bank fılıaldarynyń basshylarymen óńirlerde erekshe baqylaýǵa alýy kerek», dep túıindedi sózin  Premer-Mınıstr. Dınara BITIKOVA, «Egemen Qazaqstan». _____________________ QAZAQSTAN QOR BIRJASY habarlaıdy (KASE): Qazaqstan qor bırjasynda (KASE): eseptesýi T+1 teńgemen AQSh dollary boıynsha (USDKZT_TOM), eseptesýi T+1 teńgemen eýro boıynsha (EURKZT_TOM), eseptesýi T+1 AQSh dollarymen eýro boıynsha (EURUSD_TOM), eseptesýi T+2 teńgemen AQSh dollary boıynsha (USDKZT_SPT),eseptesýi T+2 teńgemen eýro boıynsha (EURKZT_SPT), eseptesýi T+2 eýromen AQSh dollary boıynsha (EURUSD_SPT) keshki saýda-sattyq sessııasy aıaqtaldy. Saýda-sattyqqa KASE valıýta naryǵynyń 14 múshesi qatysty. Eseptesýi T+1 teńgemen AQSh dol­larynyń baǵamy bir AQSh dollaryna 184,49 teńgeni qurady, saýda-sattyq kólemi – 68 mıllıon 900 myń AQSh dollary. Eseptesýi T+2 teńgemen AQSh dollary boıynsha mámileler jasalǵan joq. Sessııa jabylý sátine baǵa belgileýler tirkelgen joq. Eseptesýi T+1 teńgemen jáne AQSh dollarymen eýro boıynsha mámileler jasalǵan joq. Sessııa jabylý sátine baǵa belgileýler tirkelgen joq. Eseptesýi T+2 teńgemen jáne AQSh dollarymen eýro boıynsha mámileler jasalǵan joq. Sessııa jabylý sátine baǵa belgileýler tirkelgen joq.