Atyraýda ekologııa, IT jáne medıa salasyndaǵy Atyrau youth hackathon ınnovasııalyq jobalar konkýrsynyń jeńimpazdary anyqtaldy. Sheshendik óner mektebiniń jetekshisi Nurlan Azamatovtyń aıtýynsha, konkýrsqa 76 ótinim túsken. Qatysýshylardyń jobalaryn baǵalaý kezinde munaıly óńirde iske asyrýǵa bolatyn jobalarǵa basymdyq berildi.
Qazylar alqasy 9 jobany úzdik dep tanydy. Úzdik joba avtorlarynyń biri Ásem Imanǵalıeva kúkirtten qaldyqsyz sement óndirý tásilin usynǵan.
– Bul jobanyń aıasynda úsh jyl izdendim. Zertteý júrgizý úshin Atyraý munaı óńdeý zaýytynyń kúkirtin, mazýt pen kvars topyraǵyn paıdalandym. Birinshiden, kúkirtti ashyq kúıde saqtaýdyń qorshaǵan ortaǵa ekologııalyq turǵydan zardaby bar. О́ıtkeni kúkirt adamdardyń sozylmaly aýrýlaryn kúsheıtedi. Ekinshiden, Atyraý munaı óńdeý zaýyty kúkirtti Qytaıǵa óte arzan baǵamen eksporttap otyr. Sol sebepten, qaldyqtardy qurylys materıalyn jasaý arqyly qaıta qoldaný týraly ıdeıany iske asyrýdy kózdedim. Bul úshin Ońtústik Qazaqstan memlekettik ýnıversıtetiniń zerthanasynda qaýipti eksperımentter jasadym. Zertteýlerim sátti boldy. Endi tolyqqandy ónim alý úshin bul jobany áli de jetildire túsý kerek, – deıdi Á.Imanǵalıeva.
Osy jobasy úshin Ásem Imanǵalıeva birinshi júldege ıe boldy. Sondaı-aq «Atyraý-Bilim», Quic pro komandalary jeńimpaz dep tanyldy. Olarǵa 300 myń teńge sertıfıkattary tapsyryldy. Ekinshi júlde úshin 200 myń teńgeniń sertıfıkaty Nazerke Armanqyzy, Altynaı Serikbaı jáne «Estý apparaty» komandasyna berildi. Úshinshi júldeniń 100 myń teńgelik sertıfıkatyn Janel Myrzataeva, Narýalıthan Haırýllın men Bir jol komandasy ıelendi.