Qostanaı oblysyndaǵy Amanqaraǵaı ormanynda Táýelsizdiktiń 30 jyldyǵyna arnalǵan Auliekol Jastar Fest ashyq festıvali ótti. Is-sharany uıymdastyrǵan «Dostyq» balalar mádenı saýyqtyrý kesheni qyzmetkerleriniń aıtýynsha, atalǵan festıval Áýlıekól óńirinde ishki týrızm men buqaralyq sportty nasıhattaýdy kózdeıdi.
Festıvalǵa jas memlekettik qyzmetshiler men aýdannyń belsendi jastarynan quralǵan 8 komanda sporttyq jáne týrıstik baǵdarlamalar boıynsha ózara saıysqa tústi. Olardyń qatarynda Amanqaraǵaı, Novonejın, Dıev, Novoselov, Moskalev aýyldyq okrýgteri men Tımofeev aýylynyń jastar quramalary bar.
Baǵdarlama boıynsha saıyskerler týrıstik jáne sporttyq kedergilerden ótip, mejeli nysanǵa birinshi bolyp jetýi shart. Komandalar orman ishindegi ný jynystan jol tabý, ózen ótkelinen sý bolmaı ótý, velosıpedke minip jyldamdyq jarystyrý sııaqty kezeńderdi baǵyndyryp, myltyq atyp nysanaǵa dál tıgizý, aıaqqa qap kıip jarysý, arqanmen órmeleý sııaqty buqaralyq sport túrleri boıynsha synǵa tústi.
– Bul joba alǵash ret Áýlıekól aýdanynyń ákimi Erlan Temenovtiń bastamasymen 2019 jyly uıymdastyrylǵan. Byltyr pandemııaǵa baılanysty ótpeı qaldy. Endi, mine, araǵa jyl salyp taǵy qolǵa alyp otyrmyz. Auliekol Jastar Fest qysqa ýaqyt ishinde aýdan jastary asyǵa kútetin sporttyq is-sharalardyń birine aınaldy, – dedi «Dostyq» kesheniniń dırektory Bıbigúl Ábdirahmanova.
Saıys qorytyndysy boıynsha, aýdan ortalyǵy – Áýlıekól aýylynyń jastary jeńimpaz atanyp, bas kýbokty ıelendi. Alaıda festıvalǵa qatysqan komandalardyń eshqaısysy qur qol qaıtqan joq. Keshen basshylyǵy jastardyń bárine Auliekol Jastar Fest degen belgisi bar estelik syılyqtar men arnaıy dıplomdar tabys etti.