Osy jyldyń esepti merzimine deıin qaýipti isik dertinen emdelgen naýqastardyń sany - 13 256, bul kórsetkish ótken jylmen salystyrǵanda úsh myńǵa artqan. Bul málimetti brıfıng barysynda Almaty qalasy onkologııalyq ortalyǵynyń dırektory Nursultan Izbaǵambetov taratty, dep habarlaıdy Egemen.kz.
«Ońtústik astanadaǵy emdelgenderdiń sany 13 256 adam, bul ótken jylmen salystyrǵanda úsh myńǵa kóp. 2 myńnan astam kúrdeli operasııa jasalǵan. Skrınıng jáne onkologııalyq naýqastardy erte dıagnostıkalaý, sondaı-aq emdeýmen 100 paıyz qamtýdyń arqasynda qaterli isikten bolatyn ólim-jitim kórsetkishi 10,6%-ǵa tómendedi», dedi spıker.
Onyń sózine zer salsaq, júrgizilip jatqan skrınıngter óte mańyzdy ról atqaratyn kórinedi. Tekserýdiń arqasynda 148 obyr jaǵdaıy jáne 9 304 obyr der kezinde anyqtalǵan.
«Munda qaterli isik aýrýynyń 90%-y syrqattyń 1-2 satysynda skrınıng arqyly belgili bolǵan. Árıne, osyndaı jaǵdaılarda oıdaǵydaı emdeýge múmkindik bar. Sondyqtan skrınıngten ótýdiń mańyzy zor ekenin eskergen jón. Sonyń arqasynda dıagnostıkalaýǵa múmkindik týady ári isik erte satysynda emdelýi yqtımal. Keıingi kezeńderde emdeý kúrdelene túsedi», deıdi Nursultan Izbaǵambetov.
Brıfıng barysynda ol epıdemıologııalyq jaǵdaıǵa qaramastan, naýqasty emdeý barlyq ereje boıynsha júrgizilgenin tilge tıek etti.
«Eger onkologııalyq naýqas koronavırýs juqtyrsa, onda aldymen osy dertke emdeý júrgiziledi. Naýqas emdelip shyqqan soń onkologııalyq ortalyqta em alady», dep atap ótti onkologııalyq ortalyqtyń dırektory.