Qazaqstandaǵy tehnologııalar, bıznes jáne kreatıvti ekonomıkaǵa arnalǵan Digital bridge halyqaralyq forýmy aıasynda QR Sıfrlyq damý, ınnovasııalar jáne aeroǵarysh ónerkásibi mınıstrligi men HUAWEI arasyndaǵy ózara túsinistik týraly memorandýmǵa qol qoıyldy, dep jazady Egemen.kz.
Bul qujat aqparattyq-kommýnıkasııalyq tehnologııalar boıynsha seriktestikke, sonyń ishinde ekonomıka salasyn sıfrlandyrý úrdisin kúsheıtýge, aqparattyq-kommýnıkasııalyq ınfraqurylymdy damytýǵa jáne elimizdiń ǵylymı-zertteý áleýetin arttyrýǵa baǵyttalǵan.
Memorandým mynadaı baǵyttardy qamtıdy:
Elimizde, ásirese shalǵaı aýyldar úshin asa jyldam ári qoljetimdi ulttyq keńjolaqty jeli jasaý, sondaı-aq ekonomıka salalaryn sıfrlandyrý úshin platformalyq sheshimder men jańa býynnyń baılanysyn engizýdi jyldamdatý maqsatynda birige jumys isteý; Jańa tehnologııalar men sheshimder arqyly Sıfrlyq jibek jolynyń kommýnıkasııalyq ınfraqurylymyn birigip damytý; Bilim berý qyzmeti, sonyń ishinde bilim modýlderi, AKT salasyndaǵy talanttardy damytý baǵdarlamalary, ǵylymı keńes pen mamandardy oqytý boıynsha tájirıbe almasý; Kompanııa tájirıbesi negizinde Qazaqstannyń ǵylymı-tehnıkalyq áleýetin damytý boıynsha zertteýlerdi birge júrgizý.«Bul memorandým 5G, Smart City, IoT jáne Indýstrııa 4.0, IT-saladaǵy adamı kapıtaldyń sapasyn kóterý jáne t.b. salalar boıynsha seriktestiktiń bastaýy bolmaq, ásirese «Sıfrlandyrý, ınnovasııalar jáne ǵylym esebinen tehnologııalyq serpilis» ulttyq jobasyn júzege asyrý barysynda mańyzdylyǵy aıqyndala túspek», dedi QR Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
Kelisim jaıly SEO Huawei Technologies Kazakhstan Chjan Sıngo óz oıyn aıtty.
«Aqparattyq-kommýnıkasııalyq tehnologııalar salasyndaǵy seriktestik ekonomıkalyq ósimge, bıznestiń halyqaralyq básekelestigin arttyrýǵa jáne adamı kapıtaldy damytýǵa áser etip, eldiń ishki jáne syrtqy naryǵyn nyǵaıtady. Huawei kompanııasy jańa býyn baılanysyn jyldam taratyp, ekonomıka salalaryn sıfrlandyrýǵa arnalǵan platformalyq sheshimderdi jedel engizý úshin óz saraptamasyn, halyqaralyq tájirıbesin jáne joǵary tehnologııalaryn usynýǵa daıyn», dedi ol.
О́zara túsinistik týraly memorandým aqparattyq-kommýnıkasııalyq ınfraqurylym mehanızmderin jetildirýge, eldegi telekommýnıkasııa jáne ekonomıka salasyn damytýǵa jol ashyp, QR sıfrlyq ekonomıkasyn damytý maqsatyndaǵy ǵylymı zertteýler úshin derekter almasýǵa múmkindik beredi.