Qostanaı avtozaýyty 150 myńynshy avtokóligin shyǵarǵanyn málimdedi. О́ndiristik jeliden shyqqan jap-jańa 150 myń kóliktiń sońynda orta tabysty turǵyndardyń qaltasy kóteretin ári sapasy jaǵynan da eldiń qolaıyna jaǵyp, kópshilik kóńilinen shyqqan Chevrolet Nexia úlgisindegi jeńil avtokólik tur. Bul kólik Qazaqstannyń avtomobıl naryǵynda keń suranysqa ıe ári satylym jaǵynan da ózge modeldi kólikterden kósh ilgeri. Bıyl úsh toqsannyń qorytyndysy boıynsha, elimizde 9 myńnan astam turǵyn Tobyl óńirinde qurastyrylǵan Chevrolet Nexia kóligin satyp alǵan.
«SaryarqaAvtoProm» seriktestigi bıylǵy 9 aı ishinde 38 myńnan astam avtomobıl shyǵaryp, óndiris kólemin ótken jyldyń osy kezeńimen salystyrǵanda, 147%-ǵa eselep otyr. Kásiporyn pandemııa qyspaǵyna qaramastan, jyl sońyna deıin 60 myń avtokólik shyǵarýdy josparlaýda. Qostanaı zaýyty budan ózge JAC, Chevrolet, Kia, Renault, Lada, SAZ avtokólikterin de shyǵarady. Avtozaýyt bıyl Reseı, Qyrǵyzstan, О́zbekstan, Ázerbaıjan jáne Belarýs memleketterine 5 myńnan astam avtomobıl eksporttap otyr. Syrtqy saýdaǵa ketetin kólik sany jyl sońyna deıin áli de eselene túspek.
– Kásiporynnyń búgingi tolaıym tabysy zaýyt ınjenerleri men qarapaıym jumysshylardyń kásibı sheberliginiń, qajyrly eńbeginiń jemisi ekeni daýsyz. Búginde Qostanaı zaýytynda 1800-den astam adam turaqty jumys isteıdi. Jumysshylardyń bári SAP University ortalyǵynda júıeli túrde bilimin jetildirip, kásibı biliktiligin arttyryp otyrady, – dedi avtozaýyttyń baspasóz hatshysy Saıat Júsipov.
Qostanaı oblysy