Qostanaı oblysynda jyl basynan beri 443 sábı koronavırýspen aýyryp shyqqan. Qazir óńirde 8 búldirshin ınfeksııalyq stasıonarda jatyr. Oblystyq densaýlyq saqtaý basqarmasy basshysynyń orynbasary Anjela Beksultanovanyń aıtýynsha, búginde Qostanaıdaǵy ınfeksııalyq ortalyqta 50 shaqty júkti áıel emdelýde. Olardyń úsheýi jansaqtaý bóliminde jatyr.
Taıaýda ǵana bas sanıtarlyq dáriger Erlan Qııasov qol qoıǵan qaýlyǵa sáıkes, elimizde 18 jasqa deıingi jasóspirimderdi, júkti jáne bala emizip otyrǵan áıelderdi Pfizer preparatymen vaksınalaý jónindegi ádistemelik usynymdar bekitilgeni belgili. Osyǵan oraı, qarasha aıynyń basynda 4 mln Pfizer dozasy jetkizilmek. Sheteldik vaksınanyń Tobyl óńirine naqty qashan jetkiziletini ázirge belgisiz. Densaýlyq saqtaý basqarmasynyń ókilderi vaksınanyń qazan aıynyń sońyna deıin keletinin jáne 80 myń adamǵa ekpe salynatynyn aıtyp otyr.
– Densaýlyq saqtaý mınıstrligi balalardy vaksınalaý týraly sheshim qabyldap otyr. О́ıtkeni keıingi kezde koronavırýs juqtyryp jatqan balǵyndar kóbeıip barady. Balalardan kóbine indet sımptomy baıqalmaıdy. Bul, ásirese, qart kisiler men júkti áıelder úshin úlken qaýip. Aldymen 16 jastan joǵary jasóspirimder vaksına qabyldaıdy dep josparlap otyrmyz. Odan keıingi kezek tómengi jastaǵy balalardiki. Bala vaksına qabyldamas buryn, ata-ana balasyna óz yqtııarymen ekpe saldyratyny týraly kelisimge qol qoıýy kerek. Bul júkti áıelderge de qatysty. Aıaǵy aýyr áıelder júktilik merziminiń ekinshi jáne úshinshi aılyǵynda ǵana ekpe qabyldaıdy. Alǵashqy úsh aılyqta vaksına qabyldaýǵa bolmaıdy. Eger áıel júkti ekenin bilmeı vaksına alsa, tolyq kýrsty ekinshi jáne úshinshi trımestrde ǵana aıaqtaýǵa bolady. Bul úshin aldyn ala eshbir taldaý nátıjelerin tapsyrýdyń qajeti joq, – dedi oblystyq densaýlyq saqtaý basqarmasy basshysynyń orynbasary Anjela Beksultanova.
Onyń aıtýynsha, sheteldik vaksına Úkimet qorynyń esebinen satylyp alynǵan. Sondyqtan ony aıaǵy aýyr áıelder men bala emizip otyrǵan analar ǵana tegin qabyldaı alady.
Qostanaı oblysy