QR Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın vıse-mınıstrler úshin KPI-di ne úshin engizý kerektigin aıtty, dep habarlaıdy Egemen.kz.
Onyń aıtýynsha, keıbir vedomstvolardaǵy sıfrlandyrý jónindegi vıse-mınıstrler olarǵa sáıkes kelmeıtin jumystarmen aınalysty.
«Olar kompıýterlik tehnıkany satyp aldy, serverlerdi satyp alý úshin tehnıkalyq sıpattamalardy jazady. Eger basshylyqta ınternetpen birdeńe durys bolmasa, onda ony qamtamasyz etý sıfrlandyrý jónindegi vıse-mınıstrdiń ıyǵynda boldy. Shyn máninde, sıfrlandyrý jónindegi vıse-mınıstr sıfrlyq transformasııany ilgeriletýmen aınalysýy tıis», dedi Baǵdat Mýsın OKQ brıfınginde.
Ol avtomattandyrý men sıfrlyq transformasııa jumystarynyń arasyndaǵy aıyrmashylyqty túsindirdi.
«Bizge ádistemelik tapsyrmalar berilgen kezde biz avtomattandyrýmen aınalystyq. Mysaly, jer qoınaýyn paıdalanýǵa lısenzııa nemese quqyq berý. Bul quqyq zańnamalyq aktilerde jáne tıisti nusqaýlyqtarda sıpattalǵan. Jetekshilik etetin salalyq vıse-mınıstr nemese salalyq departament ony avtomattandyrý kerek dep sıpattady, sodan keıin IT mamandary ony qyzmetke aldy jáne osy prosesterdi avtomattandyrdy. Biz qoldanystaǵy normatıvtik-quqyqtyq aktilerdi negizge alyp, bıznes-prosesterdi avtomattandyrýmen aınalystyq», dep túsindirdi sıfrlandyrý mınıstri.
Mysaly, banktermen jumys jasaýdyń arqasynda avtokólik satý, avtokólikti tirkeý boıynsha onlaın-servıs paıda boldy. Mınıstrdiń aıtýynsha, munyń barlyǵy sıfrlyq transformasııa. Máselen, búgingi tańda avtokólikterdiń 36%-y onlaın rejımde qaıta rásimdelgen, adamdar HQKO-ǵa barmaıdy.
Nemese múgedektigi bar adamdarǵa múgedektik alý úshin kem degende tórt orynǵa barý kerek boldy. Endi olar emhanaǵa bir ret qana barsa jetkilikti, Sebebi medısına qyzmetkerleri barlyq derekterdi bazaǵa engizip, prosessti onlaın ótkizedi.
«Sıfrlyq transformasııa - bul barlyq prosesterdi qaıta qaraý. Búgin bar nárseni avtomattandyrýdyń qajeti joq. Prezıdent sıfrlandyrý jónindegi árbir vıse-mınıstrdiń salaǵa enip, sybaılas jemqorlyq kórinisteri jáne táýekeldermen qazirgi jaǵdaıdy ózgertýge kómektesetin ınnovasııalardy usynýy da osyny kútedi. KPI bizdiń ulttyq jobadan shyǵatyn bolady. Biz barlyǵyn engizip, árbir vıse-mınıstrdiń aldyna qoıamyz», dep túıindedi Mýsın.