«Tobyl» – chempıon!

Chempıondyqtyń taǵdyry sońǵy týrda sheshildi. О́tken aptaǵa deıin «Astana» men «Tobyl» týrnır kestesinde bir-birin ókshelep kelse de, bar má­sele 26-týrda sheshildi. El chem­pıony atanǵan «Tobyl» sońǵy týr oıynyn Oraldyń «Aq­jaıyq» ujymymen ótkizdi. Syrt alańda qarsylastarynan 2:0 ese­bimen basym túsken Aleksandr Mos­kalenko shákirtteri osylaısha el chempıony atandy.

Kezdesýdiń 28-mınýtynda «To­byl» shabýylshysy Igor Sergeev komandasyn alǵa shyǵardy. As­hat Taǵybergenniń alystan ja­saǵan soqqysyn «Aqjaıyq» qaq­pashysy qaıtarǵanymen, keıin serpilgen dopqa birinshi jetken ózbekstandyq shabýylshy dopty qaq­paǵa toǵytty. Al 60-mınýtta Ashat Taǵybergenniń ózi jeńisti goldy soǵyp, oıynnyń núktesin qoıdy. Osylaısha, 26 oıynda 61 upaı jınaǵan «Tobyl» chempıon atandy. Birinshilik barysynda «Tobyl» 18 ret jeńiske jetip, 7 ret teń oınady. Tek bir oıynda ǵana («Kaspıı – 2:1) jeńilistiń kermek dámin tatty.

Al sońǵy sátke deıin «Tobyl­men» birge chempıondyqqa talas­qan «Astana» 25-týrda syrt alań­da «Qaırattan» jeńilip, chem­pıonattaǵy jaǵdaıyn qıyndatyp alsa, sońǵy týrda týrnır kes­tesinde 12-orynda kele jatqan Túrkistannyń «Turanymen» teń oınady. Eki oıynda bir-aq upaı jınaǵan «Astana» osylaısha chempıondyq ataqty «Tobylǵa» berip qoıdy.

«Astana Arenada» ótken oıynda alań ıeleri birinshi taım­nyń 11-mınýtynda gol soǵyp, esepte alǵa shyqty. Goldyń avtory – Maks Ebong. Alǵashqy 45 mınýtty sátti aıaqtap, ekinshi taımda da elordalyqtar táýir oıyn kórsetip jatqan edi. Alaıda 78-mınýtta «Astananyń» moldovalyq legıoneri Valerıı Chýperka qy­zyl qaǵazben alańnan qýylyp, ko­mandasyn qıyn jaǵdaıda qal­dyryp ketti. Arada 2 mınýt ótken soń «Astananyń» burynǵy oıyn­shysy, qazirgi «Turannyń» kapıtany Tańat Nóserbaev gol so­ǵyp, tarazy basyn teńestirdi. Qo­rytyndy esep – 1:1.

Chempıonatty teń oıynmen bastap («Turan» – 2:2), teń oıynmen aıaqtaǵan «Astana» 26 oıynnan keıin týrnır kestesinde ekinshi orynǵa taban tiredi. 17 matchta jeńiske jetip, 6 oıynda teń túsip, úsheýinde jeńilgen elordalyq ujym 57 upaı jınady. Byltyrǵy bi­rinshilikte qola júldege qol jetkizgen «Astana» bıyl kúmis júlde ıelendi.

Sonymen qatar chempıonattyń taǵy bir mańyzdy oıyny Pe­tro­pavlda ótti. Jergilikti «Qyzyl­jar» komandasy óz alańynda Shym­kenttiń «Ordabasy» ujy­myn qabyldap, týrnır keste­sin­de tórtinshi orynǵa kim la­ıyq ekenin anyqtady. Týrnır kes­tesinde onsyz da 4-orynda tur­ǵan «Ordabasyǵa» bul oıynda teń nátıje de jetip jatyr edi. Matchtyń 90-mınýty bastalǵanǵa deıin shymkenttikter alań qo­jaıyn­darymen terezesi teń oıyn kórsetip (2:2), óz mindetterin la­ıyqty oryndap jatqan bolatyn. Biraq tóreshi qosqan qosymsha mınýtta «Qyzyljar» oıynshysy Pablo Podıo buryshtama kezinde bas­pen gol salyp, jergilikti jan­kúıerlerdi qýanyshqa bóledi – 3:2.

Osy jerde eshqandaı júldesi joq tórtinshi orynnyń qandaı mańyzy bar degen zańdy saýal týyndaıtyny anyq. Birinshilik erejesi boıynsha, eger Qazaqstan kýbogynda chempıonattaǵy al­ǵashqy úsh oryndy ıelengen koman­danyń biri top jaratyn bolsa, Eýrokýbok oıyndaryna beriletin joldama avtomatty túrde chem­pıonatta tórtinshi oryn alǵan ko­mandaǵa beriledi. Al qazir kýbok oıynynyń jartylaı fınalyna «Tobyl», «Astana», «Qaırat» jáne «Shahter» klýbtary shyqqan. Eger «Shahter» Qazaqstan kýbogyn ıe­lenetin bolsa, onda týrnır kes­tesinde tórtinshi oryn alǵan ko­manda bárinen qur qalady. En­di «Qyzyljar» jankúıerleri Qazaq­stan kýbogynyń aıaqtalǵanyn kútedi.

26-týrdyń ózge de oıynda­rynyń nátıjesi mynadaı: «Qaı­rat» – «Jetisý» – 0:0, «Aqtóbe» – «Kaspıı» – 1:5, «Taraz» – «Qaısar» – 1:2, «Shahter» – «Atyraý» – 3:1.

Tuńǵysh ret Premer-lıgada

Bıylǵy el birinshiliginiń qorytyndysy boıynsha eń nashar oıyn kórsetken eki ujym – «Qaı­sar» men «Jetisý» joǵary toptan tómengi topqa túsip qaldy. Endi eki klýb qaıtadan Premer-lıgaǵa shyǵý úshin kelesi jyly Birinshi lıgada úzdikter qatarynan kórinýi kerek. Al tómengi topta alǵashqy eki oryndy ıelengen Pavlodar oblysynyń «Aqsýy» men Túrkistan oblysynyń «Maqtaaraly» endi Premer-lıgada «Qaısar» men «Jetisýdyń» ornyn basady. Bir aıta keterligi, biri 2012 jyly («Maq­taaral»), ekinshisi 2018 jyly («Aqsý») qurylǵan eki klýb ta óz tarıhynda tuńǵysh ret Premer-lıgaǵa joldama alyp otyr. «Maqtaaraldyń» 2017 jyly joǵary topta oınaıtyn múmkindigi bolǵan edi. Alaıda elektik oıynda «Tarazdan» jeńilip, Premer-lıgadan tys qaldy.

Degenmen «Maqtaaraldyń» kelesi jylǵy chempıonattaǵy taǵdyry qyl ústinde tur. Sebebi Birinshi lıgada óner kórsetetin «Oqjetpes» klýbynan federasııa sheshimi boıynsha 9 upaı alynǵan. Eger klýb federasııa aldyndaǵy min­detterin tolyq oryndaıtyn bolsa, onda «Oqjetpes» qaıtadan Premer-lıgaǵa oralýy múmkin.

Chempıonat qorytyndysy bo­­ıynsha, jyldyń úzdik sur­mer­geni bolyp «Astananyń» hor­vatııalyq legıoneri Marın To­masov tanyldy. Ol maýsym boıy qarsylastar qaqpasyna 17 gol soqty. Ekinshi oryn «Qaırat» sha­býylshysy Artýr Shý­shenachevke buıyrsa (12 gol), úzdik úshtikti «Tobyldyń» oıyn­shysy Igor Sergeev (10 gol) túıindedi.