«Alıans Bank» AQ basqarma tóraǵasy Tımýr ISATAEVQA banktegi aǵymdaǵy ahýalǵa qatysty birneshe suraqtarǵa jaýap berýin ótingen edik.
– Tımýr Rızabekuly, qazirgi jaǵdaıda banktegi ahýal týraly aıtqanda onyń turaqtylyǵy aldyńǵy kezekte turady emes pe. Sizderdegi osy turaqtylyqtyń negizderi nede dep bilesiz?
- Alıans Bank turaqtylyǵynyń negizderin onyń Qazaqstannyń qarjy naryǵyndaǵy strategııalyq turǵydan qatysýynyń jıyrma jylǵa jýyq tarıhy jáne myqty da áleýetti basqarý toby quraıdy. Bank Bas keńsejaı qurylymyn qaıta qarady. Bul arqyly biz bıznes-úderisti jyldamdatý jáne onyń fılıaldar úshin, saıyp kelgende, Bank klıentteri úshin qoljetimdiligin arttyrý maqsatyn kózdep otyrmyz. Keleshekte óz jumysynyń tıimdiligin odan ári arttyrý jáne jańa sapalyq deńgeıge kóterilý úshin Alıans Bankte barlyq alǵysharttar men múmkindikter bar dep aıta alamyz.
– Alypqashpa sózder týdyrǵan SMS habarlamalar jaıynda ne aıtasyz?
- Sońǵy kúnderde Qazaqstannyń, ásirese, Almaty men Astananyń turǵyndary neshe túrli kúdikti SMS habarlamalar men WhatsApp Messenger habarlamalaryn alýda. Árıne, olardy nıeti durys, adal adamdar jibermegeni belgili. Dálirek aıtqanda, bul habarlamalarda úsh banktiń: SentrKredıt Banktiń, Kaspıı Banktiń jáne Alıans Banktiń taıaýda taqyrǵa otyratyndyǵy týraly aıtylǵany qazir eshkimge qupııa emes. Mine, osyǵan baılanysty atalmysh úsh banktiń jáne Qazaqstan Qarjygerleri qaýymdastyǵynyń basshylary men aksıonerleri bul aqparattyń arandatýshylyq sıpatyn aıyptaı otyryp atap kórsetedi. Áldebireýler Qazaqstannyń qarjy júıesinde dúrbeleń týǵyzý maqsatyn kózdegeni baıqalady. Osyndaı jaǵdaıda biz, álbette, qol qýsyryp qarap otyra almaımyz. Joǵarydaǵy úsh bank birigip aqparattyq shabýyldy toıtarýǵa kiristi, sonymen birge, quqyq qorǵaý organdaryna shaǵymdandy.
– Banktiń budan bylaıǵy is-áreketi, klıentterge qatysty saıasaty jaıly aıta ketseńiz? О́z mindettemelerińizdi burynǵysynsha oryndaı beresizder me?
- Sońǵy kúnderde klıentter tarapynan Bank qyzmetterine suranymnyń ósýine baılanysty bólimshelerimizdiń jumys kestesi aıtarlyqtaı uzartylǵanyn aıtýǵa tıispin. О́ıtkeni, qyzmet kórsetýdiń joǵary sapasymen árdaıym klıentterdiń kóńilinen shyǵý bizdiń Bank úshin basty basymdyq bolyp qala bermek. Alıans Bank shtattyq tártipte jumys isteýin odan ári jalǵastyratynyn atap kórsetýim qajet. Sondaı-aq, qazaqstandyqtardyń - bizdiń klıentterimizdiń salymdary boıynsha da, aǵymdaǵy esepshottar boıynsha da barlyq mindettemelerimiz tolyqtaı oryndalmaq. Taǵy bir aıta keterlik jaı, klıentterimizdiń salymdaryn memleket, ıaǵnı Qazaqstannyń depozıtterdi kepildendirý qory qorǵaıdy. Sebebi, aksııalardyń 67 paıyzyna ıe bolyp otyrǵan memleket, burynǵysynsha, Alıans Banktiń basty aksıoneri bolyp qala beredi. Bul jaı da Bank turaqtylyǵyn, jaǵdaıdyń baıyptylyǵyn saqtaý oraıyndaǵy asa mańyzdy faktor ekendigi kúmánsiz.
Áńgimelesken
Qorǵanbek AMANJOL,
«Egemen Qazaqstan».
Almaty.