Qostanaı oblystyq tarıhı-ólketaný mýzeıinde uly aǵartýshy Ybyraı Altynsarınniń 180 jyldyǵyna arnalǵan «Jas tolqyn» respýblıkalyq festıvali ótti. Baıqaýdyń qorytyndy kezeńinde Nur-Sultan, Almaty qalalarynan, Qaraǵandy, Pavlodar jáne Qostanaı oblystarynan kelgen jas sýretshiler men músinshilerdiń, qolóner sheberleriniń týyndylary kórmege qoıyldy. Uıymdastyrýshylardyń aıtýynsha, on jyl boıy oblys kóleminde uıymdastyrylyp kelgen dástúrli shara osymen úshinshi jyl respýblıkalyq deńgeıde ótip otyr.
– О́sip kele jatqan talaı talantty jastyń boıyna qanat bitirip, qabiletin damytyp, kásibı ónerge qulash sermeýine kóp yqpal etken dástúrli baıqaý buǵan deıin erkin taqyrypta ótip kelgen edi, al bıyl taqyryp bekitip, Ybyraı atamyzdyń 180 jyldyǵyna arnadyq. Baıqaýǵa júzden astam avtorlyq týyndy kelip tústi. Bul dúnıelerde uly aǵartýshynyń keskin-kelbeti somdalyp, ustazdyq qyzmetiniń túrli kezeńi aıshyq tapqan. Eń bastysy, jergilikti qylqalam sheberleri, músinshiler men qolónershiler ózge óńirlerdegi áriptesterimen tájirıbe almasýǵa múmkindik aldy, – deıdi oblystyq mádenıet basqarmasynyń basshysy Erlan Qalmaqov.
Baıqaý jumystary keskindeme, grafıka, músin, sándik-qoldanbaly óner dep atalatyn tórt nomınasııa boıynsha baǵalandy. Qazylar alqasynyń qalaýymen Qostanaı qalasynyń atynan shyqqan jas zerger Amangeldi aýdanynyń turǵyny Bekzat Muratov bas júldeni jeńip aldy.
Baıqaý jeńimpazdaryn oblys ákiminiń orynbasary Baqyt Esimova arnaı kelip quttyqtap, dıplomdarmen jáne aqshalaı syılyqtarmen marapattady. Máselen, Lısakov qalasynan kelgen 31 jastaǵy qylqalam sheberi Alına Nıkolenko Y. Altynsarın portretin sátti somdap shyqqany úshin keskindeme atalymy boıynsha júldeli oryn alyp, 150 myń teńgeniń sertıfıkatyna ıe boldy.
«Jas tolqyn» baıqaýy óz máresine jetkenimen, mýzeıdiń beıneleý óneri zalyndaǵy kórme áli bir apta jumys isteıtin bolady.
Qostanaı oblysy