Almaty TMD «aqyldy» qalalarynyń arasynda ekinshi orynda tur. Bul týraly brıfıng barysynda qalanyń sıfrlandyrý basqarmasynyń basshysy Baıan Qońyrbaev aıtty, dep habarlaıdy Egemen.kz.
Onyń aıtýynsha, Almaty TMD men Shyǵys Eýropa aýmaǵyndaǵy qalalardyń kóshbasshy tobyna kiredi. «Bizdiń megapolıs Máskeýden keıin «aqyldy» qalalar reıtınginde - ekinshi, al IDC reıtıngindegi sıfrlyq jetilý deńgeıi - 2,7 ball. Sıfrlandyrý týraly aıtqanda, prosesster «Almaty-2050» jáne «Sıfrly Qazaqstan» baǵdarlamalarynyń strategııalyq maqsattaryna sáıkes kelýi tıis ekenin túsingen jón. Biz qalany sıfrlandyrýmen qatar, turǵyndar úshin qolaıly jaǵdaı jasaýǵa tyrysamyz. Bizdiń basqarma «aqyldy» qalanyń 11 salasyn qamtı otyryp, túrli memlekettik organdar usynǵan 17 sıfrlyq ofıserdi bekitti», dep atap ótti spıker.
Almatyda biryńǵaı derekter bazasy, sıngapýrlyq Smart City modeli boıynsha birqatar jobalar iske asty. Atalǵan IT-platforma memlekettik organdarǵa ózara derektermen dereý almasýǵa múmkindik beredi.
«Máselen, 2021 jyly qalany sıfrlandyrý basqarmasynyń jumysyndaǵy basty baǵyt – biryńǵaı kommýnıkasııalyq keńistik qurý, qala qyzmetine IT keńesti tartý jáne qoldanbaly formatta ýnıversıtettermen ózara is-qımyldy qalyptastyrý boldy», deıdi Baıan Qońyrbaev.
Negizgi ıdeıa – barlyq bilim mekemelerin, tehnoparkterdi, akseleratorlar men IT-kompanııalardy tikeleı baılanysty qamtamasyz etetin bir platformaǵa biriktirý.
«Biryńǵaı kommýnıkasııalyq keńistik – IT bıznes, IT talanttar jáne bilim klasteri úshin bir tereze. Qazirdiń ózinde platformada 1800 IT talant, 17 IT kompanııa tirkelgen, 18 bos jumys orny ornalastyrylǵan, 47 bilim kýrsy bar», dedi ol. Spıker Almatynyń klasterlik damýy aıasynda qalalyq IT kompanııalar ornalasatyn aýdandyq IT habtar jobasynyń iske asyrylyp jatqanyn jetkizdi. «Jeke ınvestorlardyń qoldaýy arqasynda qalada fransýz baǵdarlama mektebiniń ECOLE 42-Academie ONE Informatique modeli boıynsha jańa býyn baǵdarlamalaý mektebi qurylýda. Budan bólek, qala ákimdigi IT kásipkerlerdi júıeli qoldaý úshin kezeńmen grant bóledi», dedi ol.