Túsinistik tamyry tereńde

Májilis Tóraǵasy resmı saparmen Ázerbaıjanda boldy Qazaqstan men Ázerbaıjan – strategııalyq áriptester. Qos eldi kóp ǵasyrdan beri jalǵasyp kele jatqan dostyq, tatý kór­shi­lestik pen yntymaqtastyq baılanystyrady. Osy jaqsy dástúr­lerge negizdelgen bizdiń elderimiz basshylarynyń sanqyrly keli­simderi eki eldi ózara yqpaldastyqtyń jańa belesine kóterdi. Al mańyzdy memleketaralyq baılanysty damytýǵa Qazaqstan men Ázer­baıjannyń zań shyǵarýshylyq organdary da zor úles qosýda. Ázerbaıjanda resmı saparmen bolǵan Qazaqstan Parlamenti Májilisiniń Tóraǵasy Nurlan Nyǵmatýlın men Ázerbaıjan Mıllı Medjılısiniń Spıkeri Oktaı Asadov aldaǵy ózara is-qımyldyń mańyzdy máselelerin talqylady. Taraptar Qazaqstan Prezıdenti Nursultan Nazarbaev pen Ázerbaıjan Prezıdenti Ilham Álıev arasyndaǵy uzaq­mer­zimdi qujattarda belgilengen maqsattardy júzege asyrýdy qu­qyqtyq jaǵynan qamtamasyz etýge basa nazar aýdardy. Nurlan Nyǵ­matýlın: – Ázerbaıjan – Qazaqstannyń Kavkaz óńirindegi negizgi jáne se­nimdi áriptesi. Jáne bizdiń prezı­dent­terimizdiń bastamasymen qu­rylǵan Túrkitildes memleketter yn­ty­maqtastyǵy keńesi túrki halyq­taryn biriktirýde mańyzdy ról atqarady, – dedi. Spıkerlerdiń pikirinshe, bizdiń elderimizdiń ınvestısııa salasynda, onyń ishinde munaı jáne gaz tasymaldaý, aýyl sharýashylyǵy, kólik jáne kommýnıkasııa, basqa da ekonomıkalyq salalarda ynty­maq­tastyq múmkindigi óte zor. Aı­maqtyq yntymaqtastyqty nyǵaı­týda Baký – Aqtaý – Baký baǵyty boıynsha paromdyq qaty­nas, sondaı-aq, Aqtaý jáne Baký ha­lyq­aralyq teńiz saýda porttary ara­synda tyǵyz baılanys ornaǵan. Kezdesý qorytyndysynda Qa­zaqstan Parlamenti Májilisi men Ázerbaıjan Mıllı Medjılısi ara­synda Yntymaqtastyq týraly kelisimge qol qoıyldy. Kelisimge sáıkes, zań shyǵarýshylyq jumy­synda tájirıbe almasý jolyn­da qos tarap, Parlamenttiń beı­in­dik komıtetteri arasynda júıe­li is-qımyldy retteýge, parla­mentaralyq uıymdar aıasynda úı­lestirilgen jáne kelisilgen máse­lelerdi ilgeriletý jolynda óza­ra yqpaldasýǵa, sondaı-aq, Túr­ki­tildes memleketter Parlamenttik Assambleıasy aıasynda túrki bir­ligin nyǵaıtýǵa yqpal etpek. О́zara únqatysýdyń mańyzyna toqtalǵan N.Nyǵmatýlın: – Ázerbaıjanda ótken bar­lyq kezdesýlerde Elbasymyz Nur­sul­tan Ábishuly Nazarbaevtyń mańyzdy bastamalaryna erekshe nazar aýdarylatynyna kýá boldyq. Jáne ol bastamalardyń eki eldiń, sonyń ishinde, zań shyǵarýshy or­gan­dar arasyndaǵy baılanysty odan ári nyǵaıtýǵa yqpal ete­tini aıqyn. Sondyqtan da bizdiń par­la­mentterimiz arasynda arnaıy kelisimge qol qoıyldy. Árıne, bul qujat bizdiń Elbasynyń já­ne Ázerbaıjan Prezıdentiniń stra­te­gııalyq kelisimderin zań jaǵynan qoldaýǵa, sonymen birge, bizdiń elderimizdiń keleshekte tabysty da­mýyna úles qosatyny sózsiz, – dedi. Májilis Tóraǵasy Baký mem­le­kettik ýnıversıtetiniń profes­sor-oqytýshylar quramymen jáne stýdentterimen kezdesti. Bul – bıylǵy jyly qurylǵanyna 95 jyl tolatyn atalǵan eldegi eń ta­nymal oqý oryndarynyń biri. Bul jerde jumys istegender jáne oqy­ǵandar qatarynda búgingi kúni Ázer­baıjannyń qalyptasý tarıhynda óz qoltańbasyn qaldyryp júrgen ǵa­lymdar, qoǵam qaıratkerleri óte kóp. Júzdesý barysynda Qa­zaq­stan­nyń 2050 jylǵa deıingi da­mý bolashaǵy, Elbasynyń Jol­daýy, sondaı-aq, Qazaqstan–Ázer­baı­jan yntymaqtastyǵynyń aýqym­dy máseleleri nazarǵa alyndy. N.Nyǵ­matýlın Qazaqstan úshin Ázer­baıjanmen qarym-qaty­nas­ty dostyq, tatý kórshilik jáne stra­te­gııalyq áriptestik deńgeıinde damytý Elbasy Nursultan Nazar­baevtyń syrtqy saıasattaǵy basym baǵyttarynyń biri ekenin atap ótti. Parlament Májilisiniń zań shyǵarýshylyq jumysy da tilge tıek etilip, ásirese, Elbasy Jol­daýyn tıimdi júzege asyrýǵa baǵyttalǵan zań jobalaryna nazar aýdaryldy. Qos el baılanysynyń áleýetine toqtalǵan Májilis Tóraǵasy mu­naı-gaz, óndiristik sektor, logıs­tıka, aýyl sharýashylyǵy salalarynda ózara is-qımyldy jetildirý kerektigin alǵa tartty. «Bizdiń baý­yrlas elderimizdiń senimdi jáne údemeli damýy ekijaqty árip­tes­tiktiń tabysty nyǵaıýy men elderi­miz arasyndaǵy ózara tıimdi ınte­grasııaǵa tyń serpin beretin bolady», – dedi N.Nyǵmatýlın. Jınalǵandar Qazaqstan Pre­zı­dentiniń Joldaýyna asa qyzy­ǵýshylyq tanytty. Máselen, G.Álıev atyndaǵy «Ázerbaıjan – Qa­zaq­stan» respýblıkalyq dostyq qoǵa­mynyń prezıdenti Eldar Gıý­naı: «Qazaqstan Prezıdentiniń Kas­pıı aımaǵyna qatysty máse­le­lerdiń barlyǵyn qamtyǵany óte mańyzdy. Menińshe, Qazaqstan da­myǵan 30 eldiń qataryna kirý maqsatyna jetedi. Biz sizderdiń el­derińizdiń jetistikteri úshin maq­tanamyz jáne aldaǵy ýaqytta da ıgilik pen órkendeý tileımiz», – dep aǵynan jaryldy. Odan ári Májilis Tóraǵasy birneshe jyl buryn ýnıversıtette ashylǵan Abaı atyndaǵy qazaq tili, tarıh jáne mádenıet ortalyǵy tynysymen tanysty. Bul jerde stýdentter barlyq tanymdyq qu­raldardy paıdalana otyryp, adam­zat ǵulamasy atanǵan uly Abaı­dyń shyǵarmashylyǵymen tanysa alady. Baký memlekettik ýnıversıteti tarıh fakýltetiniń túrki halyq­tarynyń tarıhy kafedrasynyń dosenti Sanýbar Ismaılova: «Eki eldiń áriptestigi strate­gııa­lyq mańyzǵa ıe. Bizdiń prezıdent­teri­mizdiń salıqaly saıasaty­nyń arqasynda dostyq jáne ta­tý kór­shilik baılanysymyz árqashan­da joǵary deńgeıde damıtyn bolady», – degen oıyn ortaǵa sa­la kelip, aldaǵy ýaqytta da Qazaq­stan men Ázerbaıjan qarym-qaty­nasynyń nyǵaıa túsetinine senim bildirdi. Sáýlebek BIRJAN.