Qostanaıda kezinde ultymyzdyń ańshylyq pen jaýyngerlik óneriniń erekshe óristep damyǵan túrleriniń biri – dástúrli sadaq atý mektebi ashyldy. Munda keletin eresekter men balalarǵa jebe tartýdyń erejesi men mergendiktiń qyr-syryn dástúrli sadaq tartýshylar úıretetin bolady.
Jańa mekteptiń ashylý saltanatyna Respýblıkalyq sadaq atý federasııasy men oblystyq kásipkerler palatasynyń ókilderi, jergilikti kásipkerler, din qyzmetkerleri, sondaı-aq zııaly qaýym ókilderi men esimderi elge belgili sportshylar qatysty.
Dástúrli mektepti ashyp otyrǵan sportshy Aıaýlym Appazova sadaq atýdan el chempıony, talaı halyqaralyq jarystarǵa qatysyp,
joǵary nátıjege qol jetkizip júr.
– Men Naýyrzym aýdanynda týyp-óstim. Sadaq atý – ata-babamyzdan qalǵan dástúrli óner. Bul da ulttyq sporttyń bir túri. О́zim osy salada júrgen soń, sadaq atý dástúri týǵan óńirde de jandansa eken degen nıetpen oblystyq kásipkerler palatasynan kómek suradym. Palata jobamdy qoldap, mektepti ashý barysynda zańgerlik keńes berip, kóp kómektesti. Biz óz mektebimizdegi jattyǵý jumystaryna qazaq, túrik jáne mońǵol sadaǵyn paıdalanatyn bolamyz. Olar eýropalyq nemese shyǵysazııalyq sadaqtarǵa qaraǵanda qysqa ári jeńil, at ústinde shaýyp kele jatyp atýǵa yńǵaıly keledi. Qazaq sadaǵymen 180 metr qashyqtan nysanaǵa dál tıgizýge bolady. Qostanaı óńirinde jebe tartý kenje qalǵandyqtan, onyń paıdasyn da kóp adam eskere bermeıdi. Mysaly, sadaq atyp ádettengen adamnyń arqa bulshyq etteri jaqsy damıdy, omyrtqalary myqty bolady jáne kórý qabileti jaqsarady, – deıdi Aıaýlym.
Mekteptiń ashylý rásiminde sóz alǵan «Olja-Agro» seriktestiginiń bas dırektory Aıdarbek Hodjanazarov kópshilikti Tobyl óńirinde tuńǵysh jumysyn bastaǵan ulttyq mekteptiń paıda bolýymen quttyqtap, dál osyndaı sadaq atý klýbtarynyń aýyldyq mekenderde de ashylý kerektigin tilge tıek etti.
– Bizdiń seriktestiktiń Uzynkól, Sarykól aýdandarynda mádenıet ortalyqtary bar. Eger sol óńirlerge baryp ulttyq sport úıirmelerin ashqylaryńyz kelse, biz óz tarapymyzdan qarjylaı demeýshilik jasap, qoldaý kórseter edik, dedi seriktestik basshysy.
Saltanatty sharaǵa arnaıy kelgen respýblıkalyq dástúrli Sadaq Aty federasııasynyń vıse-prezıdenti Dıas Ahmetov Aıaýlym Appazovaǵa sadaq atý jattyqtyrýshysynyń sertıfıkatyn tabys etip, óz shákirtterimen birge jebe tartýdan sheberlik sabaǵyn kórsetti.
Qostanaı oblysy