Shymkent qalasynda turǵyndardy jıdek ónimderimen qamtamasyz etý úshin bıyl alǵash ret 0,5 ga jerge jańa ádispen qulpynaı ósirile bastady. Onda ǵylym men tehnıkalyq jetistikterdi qoldaný arqyly «Alba» jáne «Klırı» suryptary egilgen, dep habarlaıdy Egemen.kz.
Innovasııalyq joba sharýalarǵa qalalyq aýyl sharýashylyǵy jáne veterınarııa basqarmasy men kásipkerler palatasynyń uıymdastyrýymen ótken semınarda praktıkalyq negizde kórsetildi.
Bul joba – úı irgelik jerlerdi ıgerip, qala halqynyń tabysyn arttyrý jáne turǵyndardy qulpynaı ónimimen qamtý maqsatynda qolǵa alyndy.
Mamandar qulpynaıdy jylyjaıda plastık paketterge otyrǵyzý arqyly kóp ónim alýǵa bolatynyn aıtady. Qulpynaıdy ósirý úshin tamshylatyp sýarý ádisi qoldanylady.
Qazirgi ýaqytta qulpynaı ónimderiniń 70-90% jeke qosalqy sharýashylyqtarda egiledi. Alaıda, olar zamanaýı tehnologııalardy qoldanbaýynan ónimdilik tómen jáne tek maýsym aralyq merzimde ǵana ósiredi. Negizinen Qazaqstan boıynsha qulpynaı bıznesi damymaǵan, naryqta kóbinese ımporttyq qulpynaılar saýda sórelerinen tabylady.
Mamandar búginde jıdek daqyldarynyń, onyń ishinde baqsha qulpynaıynyń assortımentin keńeıtý jáne ónimdiligin arttyrý problemasy óte ótkir ekenin aıtady. Sondyqtan osy jobany júzege asyrý arqyly qala halqyn otandyq ónimmen qamtý múmkindigi artatynyn jetkizdi.
Joba sátti júzege asatyn bolsa, jańa tehnologııa qalanyń basqa da fermerlik sharýashylyqtarynda engiziletin bolady.