Memleket qaıratkeri Smaǵul Sádýaqasulynyń esimi jas urpaqtyń jadynda qaıta jańǵyrǵandaı. Elimizdiń bas gazetin «Eńbekshil qazaq» bolyp turǵan tusta basqarǵan tulǵanyń aty elordadaǵy №78 mektep-gımnazııasyna berildi. Mektep ujymy bul úshin biraz kedergiden ótip, ter tókken kórinedi.
Atalǵan bilim oshaǵynyń basshysy Janar Jumabekova aıtýly oqıǵa el Táýelsizdiginiń torqaly toıyna tamasha tartý bolǵanyn aıtady.
«Bıyl Táýelsizdikke 30 jyl tolyp otyr. Shırek ǵasyrǵa jýyqtaǵan bul shattyqtyń qashanda bási basym. Osy aıbyndy mereıtoı qarsańynda el ishinde atqarylyp jatqan ıgi is-sharalar men izgi jumystar kóńilge qýanysh uıalatady. Ásirese, elordanyń tórinde ornalasqan №78 mektep-gımnazııasy úshin de este qalatyn jyl. Sebebi bilim ordasyna memleket jáne qoǵam qaıratkeri Smaǵul Sádýaqasulynyń esimi berildi. Osylaısha, birneshe jyldan beri jas urpaqqa qaıratkerdiń erlik isterin nasıhattaý baǵytyndaǵy mektep murajaıyn ashý, turaqty túrde «Smaǵultaný» aptalyǵyn ótkizý, qalalyq deńgeıde ǵylymı konferensııa, respýblıkalyq dóńgelek ústel uıymdastyrý syndy aýqymdy jumystardyń nátıjesin kórdik. Negizi, mundaı mańyzdy bastamany kóterip, onyń júzege asýynda, fılologııa ǵylymynyń doktory, professor, alashtanýshy Dıhan Qamzabekulynyń eńbegin erekshe atap ótý kerek», deıdi mektep dırektory J.Jumabekova.
Biz osy rette ıgi iske muryndyq bolǵan D.Qamzabekulynyń ózin sózge tarttyq. Alashtanýshy óz oıyn S.Sádýaqasulynyń ómiri men eńbek joly Qazaqstanda ǵana emes, shetelderde de nasıhattalýy kerek ekenin jetkizýden bastady. Onyń aıtýynsha, HH ǵasyrdyń basyndaǵy ult zııalylarynyń aǵartý, bilim, mádenıet, saıasat salasyndaǵy eńbekteri qazaq halqyna ǵana emes, álemdik tutastyqqa, adamzattyq úılesimge qyzmet etti. Sonyń ishinde Smaǵul Sádýaqasuly jastaıynan saıasatqa aralasty. Bilim, mádenıet, aqparat, qoǵamdyq damý baǵyty kiretin Halyq aǵartý komıssarıatyn (mınıstrligin) basqardy. Osyndaı azamattyń atyn elordadaǵy mektepke berý usynysy ákimdik tarapynan bir aýyzdan qabyldandy.
«Degenmen ózderińiz bilesizder, biraz ýaqyt mekeme, jer atyn ózgertýge moratorıı jarııalandy, sodan kesheýildedi. Oǵan qosa komıssııa otyrysy kezinde birqatar kedergige de keziktik. О́kinishke qaraı, máslıhat depýtattary men qoǵamdyq keńes músheleriniń ishinde S.Sádýaqasulyn múlde tanymaıtyn, tipti tanyǵysy da kelmeıtin adamdar boldy. Bir-ekeýi qarsy sóılep, «tanystaryńdy tyqpalap jatyrsyńdar» degenge deıin bardy. Árıne, Alashty jáne ult zııalylary qaıratkerligin bilmeý – qoǵamdyq sanadaǵy olqylyq. Áli esimizde, 1998 jyly astanada 40 mektep bolatyn. Sonda biraz zııaly bul oqý oryndaryna bilim-ǵylymnyń bastaýynda turǵan 40 Alash tulǵasynyń esimin bereıik degenbiz. Ol kezde Alashty qadirleıtin sheneýnik te azdaý edi. Al Táýelsizdiktiń 30 jyldyǵy qarsańynda osy kózqarastyń salqynyn sezgenimizde, kimdi kinálarymyzdy bilmedik. Abyroı bolǵanda, báribir zııalylyq pen parasat jeńdi. Túptep kelgende jeńis – naǵyz tabandylyq tanytqan mekteptiń ujymy men sol kezdegi qalalyq bilim basqarmasyn basqarǵan Qasymhan Senǵazıevtiki. Biz ǵalym retinde istiń sátti bastalyp, dáıektelýin júıelep qana otyrdyq», deıdi D.Qamzabekuly.