29 jeltoqsanǵa josparlanǵan IBF jáne IBO tujyrymdary boıynsha álem chempıony Gennadıı Golovkın men WBA (Super) belbeýiniń ıegeri, japonııalyq Rıota Mýrata arasyndaǵy jekpe-jek koronavırýstyń omıkron shtamynyń taralýyna baılanysty keıinge qaldyrylǵany málim, dep habarlaıdy Egemen.kz.
Endi eki boksshy arasyndaǵy uzaq kútken kezdesý kelesi jyldyń kókteminde ótpek. Bul týraly Gennadıı Golovkınniń promoýteri Tom Leffler habarlady.
«Japonııa tarıhyndaǵy eń úlken jekpe-jektiń keıinge qaldyrylǵany bizge de ońaı soqqan joq. Genanyń komandasy retinde biz bul shaıqasty asyǵa tosqan bolatynbyz. Bul jekpe-jek aldaǵy jyldyń kókteminde ótedi degenge senemiz. Ázirge qaı aıdyń qaı kúninde uıymdastyrylatynyn tap basyp aıtý múmkin bolmaı tur. Múmkindik bolsa bul boks keshin jedel uıymdastyratyn bolamyz», deıdi promoýter.