Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Táýelsizdik taǵylymy» atty maqalasynyń sońyna qaraıǵy mynadaı sózder kózime ottaı basyldy. «Eń bastysy – elimiz aman, urpaǵymyz azat. Biz alaqanǵa salyp ósirgen sol azat urpaq endigi jerde «Men Qazaqstanyma ne beremin?» degendi oılaýy kerek», deıdi Ult Kóshbasshysy.
Dál osy jerge kelgende gazetti qoıa turyp, qalyń oıǵa shomdym. Iá, men ózim osy jasqa kelgenshe ne tyndyrdym? El esinde jaqsy atymmen qalatyndaı qandaı ıgi hám sharapatty ister atqardym? Qarap tursańyz, bul ózin ózi sanaly sanaıyn árbir azamattyń uıqysyn qashyryp, mazasyn alatyn saýal eken-aý...
Iá, bul suraqty ózine qoıa bilgen arly jannyń jaýaby da daıyn bolýy shart. Túptep kelgende, bul degenińiz adamnyń ózine ózi esep berýi ǵoı. Menińshe, Qazaqstannyń árbir eljandy azamaty bul suraqty ózine kúnde qoıyp, jaýabyn adal isimen, sińirgen eńbegimen kórsetýi tıis dep oılaımyn.
Áli esimde, táýelsizdik alǵan jyldardyń bas jaǵynda Jezqazǵan óńirine jumys saparymen kelgen Tuńǵysh Prezıdentten kóptegen jýrnalısterdiń arasynda turyp, radıo tilshisi retinde suhbat alǵan edim. Sol kezde janary ot shashqan Nursultan Nazarbaevtyń árbir sózi mergenniń atqan oǵyndaı nysanasyna dóp tıip jatyp edi. «Iá, – degen sonda Tuńǵysh Prezıdent, – qazirgi qıyndyqty el bolyp birigip jeńetinimizge bek senimdimin. Bul qıynshylyqtyń bári bir kórgen tústeı óte shyǵady, umytylady. Biz birligimiz ben yntymaǵymyzdyń arqasynda áli-aq ósip-órkendegen memleketke aınalamyz».
Mine, sodan beri jyljyp birtalaı jyl ótti. Búginde Elbasynyń aıtqany aıdaı keldi. Joǵaryda atalǵan maqalasynda ol bylaı dep jazady: «Men otyz jyl boıy halqymdy qanattyǵa qaqtyrmaı, tumsyqtyǵa shoqytyrmaı, qaırańǵa qaldyrmaı, álemdik órkenıettiń aldyńǵy shebine, dúnıedegi eń damyǵan 40 eldiń qataryna qostym. Osy jyldar ishinde álemdik ǵylym men mádenıettiń eń úzdik jetistikterin meńgergen jańa urpaq qalyptasty. Jańa elordamyz salyndy. Eń úlken tabysym da, eń úlken baqytym da osy dep sanaımyn».
Týra osy joldarǵa kelgende keıbir pıǵyly teris pendelerdiń syńarezý pikir aıtyp, jaqtyrmaǵandaı myrsyldaǵanyn estip te júrmiz. Iá, tarıhtyń ólshemimen alǵanda qas qaqqandaı-aq ýaqyt – otyz ǵana jyldyń ishinde oıdy da, qyrdy da túgel gúldendirip tastaý degen aqylǵa syımaıtyn sharýa. Táýekelge bel býyp, iri isterdiń jalynan alǵan jas memlekette usaq-túıek kemshilikter, olqylyqtar bolmaıdy dep kim aıtty?!
Túımedeıdi túıedeı etý árkimniń qolynan keledi, al bir túıir bolsa da elge paıdamdy tıgizsem degen pıǵyl, ókinishke qaraı, keıbir azamattarda az bolyp tur. Endeshe, nıetti ońǵaryp, kemshilikti keńshilikpen túzeıtin sana bıigine kóterile alsaq, elimizdiń eńsesi burynǵydan beter asqaqtaı túser edi-aý!
Bekzat ALTYNBEKOV,
Qaraǵandy oblystyq QHA tóraǵasynyń orynbasary, oblystyq Qoǵamdyq kelisim keńesiniń tóraǵasy, oblystyq máslıhattyń depýtaty
Qaraǵandy oblysy