Qostanaı oblysynyń ákimi Arhımed Muhambetov tórt balany órtten qutqaryp qalǵan jasóspirim Oleg Pırogpen kezdesti. Oblys basshysy úıi órtenip, baspanasyz qalǵan О́mirzaqovtar otbasyn da qabyldap, otaǵasyna páter kiltin tabys etti, dep jazady Egemen.kz.
Esterińizde bolsa, buǵan deıin jeltoqsannyń 25-i kúni Qostanaıdyń shetindegi saıabaqta ornalasqan turǵyn úılerdiń biri órtengenin, qyzyl jalynnyń ishinde qalǵan shıetteı tórt balany 5 synyp oqýshysy Oleg Pırog qutqaryp qalǵanyn jazǵan edik.
2 jastan 8 jasqa deıingi tórt balany tárbıelep otyrǵan О́mirzaqovtar otbasy 2019 jyldyń qyrkúıeginen bastap kópbalaly otbasy retinde turǵyn úı kezeginde tur. Baspana kezegi boıynsha toǵyzynshy orynda turǵan bul otbasy qazirshe jaqyn týystarynyń úıin panalap otyr.
Kezdesý barysynda Arhımed Muhambetov kópbalaly otbasyna Abaı kóshesiniń boıynan aýdany 76,6 sharshy metr bolatyn 3 bólmeli páterdiń kiltin tabys etti.
Al órt ishinde qalǵan tórt balany aman alyp shyqqan Oleg Pırog oblys ákiminiń qolynan Alǵys hat pen noýtbýk aldy. A.Muhambetov ónegeli ójet perzent tárbıelep otyrǵan Olegtiń ata-anasyna da alǵys aıtty.
«Eń aldymen Olegtiń ata-anasyna alǵys aıtamyn. Valentına Vladımırovna, sizdiń otbasyńyzǵa jaqsylyq, densaýlyq, baqyt pen amandyq tileımin. Oleg, batyldyq pen janqııarlyq kórsetkeniń úshin taǵy da rahmet. Oqýda úlken joǵarǵy nátıje, tabys tileımin. Barlyq armanyń oryndalsyn», dedi aımaq basshysy.
Batyr bala Olegtiń ózi de kópbalaly otbasynan. Bir shańyraqtyń astynda ata-anasymen jáne bes baýyrymen birge turady. Tórt birdeı óndir ómirdi órtten arashalap qalǵan ójet balanyń erligin estigen birneshe kásipker Olegke baǵaly syılyqtaryn daıyndap qoıǵanyn habarlady.
Qostanaı oblysy