Sáttibaev pen Safıýllın top jardy

Ázerbaıjannyń astanasy Bakýdegi «Shagan» olımpıadalyq sport kesheninde bokstan eresekter arasyndaǵy dástúrli «Uly Jibek joly -2014» týrnıri bolyp ótti. О́tken jeksenbide máresine jetken báseke qorytyndysy boıynsha qazaq eliniń boksshylary 2 altyn, 1 kúmis jáne 1 qola medalǵa ıe boldy. Álemniń 9 elinen 130 bylǵary qolǵap sheberleri qatysqan aıtýly jekpe-jekte elimizdiń talantty boksshylary Oljas Sáttibaev (52 kg) pen Zakır Safıýllın (60 kg) týrnır jeńimpazy atandy. Al Dáýren Eleýsinov (81 kg) kúmis medaldy oljalady. Qola medal Saǵadat Rahmanqulovqa buıyrdy.  

«AQTО́BE» – SÝPERKÝBOK IEGERI

Senbi kúni «Aqtóbe» komandasy elimizdiń byltyrǵy chempıony Qaraǵandynyń «Shahter» klýbyn Qazaqstan Sýperkýbogy úshin ótken matchta 1:0 esebimen utty. Kezdesýde jalǵyz dopty Danılo Neko soqty. Ol oıynnyń 68-mınýtynda Marat Haırýllınniń ádemi pasyn paıdalanyp, Mokınniń toryna toǵytty. Osy esep matchtyń sońyna deıin saqtalyp qaldy. Jalpy, bul kezdesýde «Aqtóbe» qarsylastaryna qaraǵanda ádemi oıyn órnegin kórsetti. Muny oıynnyń sońynda bergen suhbatynda «Shahterdiń» bas jattyqtyrýshysy Vıktor Kýmykovtyń ózi moıyndady. Dastan KENJALIN, «Egemen Qazaqstan».