Búgin QR Úkimet elimizdiń barlyq óńirinde gazdyń shekti baǵasyn bekitti. Shekti baǵa 180 kúnge belgilengen, dep habarlaıdy Egemen.kz.
QR Premer-Mınıstr resmı saıtynyń málimetinshe, Aqtóbe, Atyraý, Mańǵystaý oblystarynda – gazdyń lıtri 50 teńge ( 200 shaqyrymnan asatyn shalǵaı aýdandar úshin – lıtrine 55 teńge) bolyp belgilendi. Al Shymkent qalasynda Shyǵys Qazaqstan, Jambyl, Batys Qazaqstan, Qyzylorda jáne Túrkistan oblystarynda gazdyń lıtri 60 teńgeden (200 shaqyrymnan asatyn shalǵaı aýdandar úshin - lıtrine 65 teńge) satylady. Almaty qalasynda lıtri 65 teńge bolady. Nur-Sultan qalasynda, Aqmola, Almaty, Qostanaı, Qaraǵandy, Pavlodar, Soltústik Qazaqstan oblystarynda gazdyń lıtri 70 teńge ( 200 shaqyrymnan asatyn shalǵaı aýdandarda – lıtrine 75 teńge) bolyp bekitildi.
Aıta keterligi, suıytylǵan munaı gazyn elektrondy saýda alańdary arqyly satýǵa tolyqtaı aýysý bir jylǵa keıin shegerildi.
Benzın men dızel otynyn satýǵa ýaqytsha 180 kúnge baǵany memlekettik retteý engizildi. Benzınniń qosymsha qun salyǵyn esepke ala otyryp bólshek saýdasyna kelesideı shekti baǵalar belgilendi: AI-80 markaly – lıtrine 89 teńge; AI-92 markaly – lıtrine 182 teńge; AI-93 markaly – lıtrine 182 teńge; AI-95 markaly – lıtrine 215 teńge.
Dızel otynynyń (jazǵy, maýsymaralyq) QQS eskere otyryp, bólshek saýdasyna shekti baǵalar óńirge baılanysty belgilendi:
Aqmola, Aqtóbe, Shyǵys Qazaqstan, Batys Qazaqstan, Qostanaı, Soltústik Qazaqstan oblystarynda – lıtrine 260 teńge;
Nur-Sultan, Almaty, Shymkent qalalary, Almaty, Atyraý, Jambyl, Qaraǵandy, Qyzylorda, Pavlodar, Túrkistan oblystarynda – lıtrine 230 teńge.
Jańaózen qalasynda jańadan gaz óńdeý zaýytynyń qurylysyna daıyndyq jumystary jedeldetildi.
Taıaý ýaqytta retteletin kommýnaldyq qyzmetterge: sýmen qamtamasyz etý, sarqyndy sýlardy burý, jylýmen qamtamasyz etý, gazben qamtamasyz etý jáne elektrmen qamtamasyz etýge tarıfterdiń kóterilýine 180 kúnge ýaqytsha maratorıı engiziletin bolady.
Áleýmettik mańyzy bar azyq-túlik taýarlaryna, onyń ishinde sıyr, qoı etteri, kartop jáne sábizge baǵalardy turaqtandyrý maqsatynda iri qara men usaq maldardy 6 aıǵa, kartop pen sábizdi 3 aıǵa shetelge shyǵarýǵa tyıym salyndy.